Алишер Навоий номли Наманган вилоят театри бу гал санъат шайдолари билан эмас, соғлиқни сақлаш муассасалари вакиллари билан тўлди: театрда Тошкент тиббиёт академияси ва Андижон давлат тиббиёт институтини тамомлаган 75 нафар мутахассисни кутиб олиш тадбири ташкил этилди. Бу ҳақда «Дарё»га вилоят соғлиқни сақлаш бошқармаси матбуот хизмати маълум қилди.
Бошқарма бошлиғи Солижон Мўминовга кўра, вилоятдаги тиббиёт муассасаларида шифокорлар етишмаслиги кузатилаётганди. Қабул қилинган қатор ҳужжатлар ҳаётга татбиқ этилаётганлиги боис бу долзарб масала ечимини топмоқда. Жорий йилнинг ўзида 214 нафар битирувчи вилоятдаги даволаш-профилактика муассасаларида фаолиятини бошлайди. Уларнинг бир гуруҳи мамнуният ва катта умид билан қарши олинди.
Вилоят ҳокими Хайрулла Бозоров шифокорларнинг янги отрядини масъулиятли ишга киришиши билан қутлар экан, ёш врачлар халқ саломатлигини мустаҳкамлашда жонбозлик кўрсатишига ишонч билдирди ва омад тилади.
«Поликлиникамиз ҳудудда яшовчи 51 минг нафар аҳолига хизмат кўрсатади. Бироқ 21 нафар врач ўрни бўш турганлиги учун муаммолар юзага келаётган эди. Мана, илк битирувчи сафимизга қўшилди. Яқин кунларда яна ёш мутахассислар гуруҳи келяпти. Уларга барча шароитларни яратиб берилади, устоз-шогирд анъаналари намунали йўлга қўйилади», — дейди Наманган шаҳридаги 9-оила поликлиникаси бош шифокори Насиба Дадабоева.
Тошкент тиббиёт академияси битирувчиси Исломбек Нажимов, Андижон давлат тиббиёт институти тамомловчиси Нигора Ваҳобова маросимда сўзга чиқиб, олийгоҳларда олинган назарий билимлари ва касбий кўникмаларини амалиётда қўллашга тайёр эканликларини таъкидлади.
Маросимда битирувчиларга маълумотномалар топширилди. Вилоятнинг бирламчи тиббий-санитария муассасаларига ишга жойлаштирилганликлари, икки ставкадан ишлашлари учун ҳам шароит яратиб берилиши маълум қилинди.
Изоҳ (0)