«Ўзстандарт» агентлиги томонидан республиканинг барча деҳқон бозорларидаги тарози ва тарози тошларидан фойдаланишнинг бугунги ҳолати таҳлил қилинди. Бу ҳақда агентлик матбуот хизмати хабар бермоқда.
Ўзбекистонда жами деҳқон бозорлари сони 280 тани ташкил этиб, шундан савдо ўринларининг сони эса 115 505 тани ташкил этади. Шундан тарози талаб этиладиган савдо ўринлари сони 47 754 тани ташкил этади. Ўрганишлар натижасида ҳозирги кунда деҳқон бозорларида 17 847 дона тарозилардан фойдаланилаётгани аниқланди.
Вилоятларнинг деҳқон бозорларида етишмайдиган тарозиларни харид қилиш ва механик тарозиларни янгилаш мақсадида замонавий электрон тарозиларни 2017 йилда харид қилиш режалари ишлаб чиқилди ва вилоят ҳокимликлари томонидан тасдиқланди.
Ушбу режаларга кўра, жорий йилда жами 7 859 дона электрон тарозиларни харид қилиш белгиланган бўлса-да, бугунги кун ҳолатида эса жами 2 455 дона яъни (31,2 %) харид қилинган.
Хабарда қайд этилишича, агентликнинг ҳудудий марказлари томонидан деҳқон бозорлари маъмурятига бир неча бор мурожаат этилган, бироқ бозор маъмурияти тарозиларни харид қилиш ишларига бефарқ муносабатда бўлмоқда.
«Масалан, Андижон, Бухоро, Жиззах, Наманган, Самарқанд, Сурхондарё ва Хоразм вилоятларида фаолият юритаётган деҳқон бозорларида вилоят ҳокимликлари томонидан режалар тасдиқланган бўлишига қарамай, замонавий тарозиларни харид қилиш режаси бажарилмади», — дейилади хабарда.
Изоҳ (0)