Россия Марказий ҳарбий округи бошқарув таркибининг Челябинск вилоятида ўтказилган йиғинда илк бор Ўзбекистон Қуролли кучлари Бош штаби зобитлари қатнашди. «ТАСС» хабарига кўра, йиғилишда Қирғизистон вакиллари ҳам қатнашган.
«Иштирокчилар Суриядаги жанговар ҳаракатлар тажрибаси асосида Марказий Осиё стратегик йўналиши бўйича бирлашган қўшинларни қўллашни режалаштиришнинг муаммоли масалалари муҳокама қилинди, жанговар тайёргарликнинг янги методикалари кўриб чиқилди», — деди округ қўшинлари қўмондони ёрдамчиси полковник Ярослав Рошчупкин.
Йиғинда Россия Марказий ҳарбий округи, Россия гвардияси, Ички ишлар вазирлиги, Фавқулодда вазиятлар вазирлигининг 500 га яқин генерал ва офицерлари қатнашди. Ўзбекистон ва Қирғизистон ҳарбийлари тактик ва тезкор босқичда разведка-зарбдор мажмуаларни ташкил этиш бўйича машғулотларда қатнашди.
Улар қўмондонлик шохобчаси фаолияти билан танишган. Шунингдек, Россия 90-танк дивизияси бўлинмалари «жиҳод-мобиллар»га қарши кураш усулларини намойиш этган. Йиғин давомида террорчиликка қарши кураш масалалари муҳокама қилинган.
Россия Марказий ҳарбий округи мамлакатнинг уч федерал округи ва 29 субъектини ўз ичига олган. Шунингдек, Тожикистондаги 201-ҳарбий база, Қирғизистондаги ҳарбий база, шунингдек, Қозоғистон ҳудудидаги бўлинма ҳам шу округ таркибига киради.
Изоҳ (0)