Ўзбекистонга қишки спорт турлари қайтиб, хоккей, фигурали учиш, кёрлинг ва чанғи спорти федерациялари иш бошлайди

Ўзбекистонда бирйўла 4 та қишки спорт тури бўйича янги федерациялар иш бошлашга яқин. Бу ҳақда МОҚ матбуот хизмати хабар берди.

Хабарда айтилишича, МОҚ биносида мазкур ташкилот, шунингдек, Спорт Қўмитаси, Ўзбекистон қишки спорт турлари ассоциацияси ҳамда соҳа мутахассислари, ҳомий ташкилотлар иштирокида айнан шу масала юзасидан йиғилиш бўлиб ўтган. Бунга асос бўлиб Ўзбекистон Президенти Шавкат Мирзиёевнинг 31 октябрь куни ўтказган спорт соҳасини ривожлантириш борасидаги йиғилишда берган топшириғи ҳамда қишки спорт турларини ривожлантиришга қаратилган қарори лойиҳаси хизмат қилган.

Қишки спорт турларини ривожлантириш болалар спортидан бошланади. Бу йўлда ташаббус гуруҳи ташкил этилган бўлиб, у қишки спорт турлари бўйича тўртта мустақил федерация фаолиятини йўлга қўйиш, профессионал мутахассисларни ишга жалб қилиш, федерацияларнинг самарали фаолият юритиши учун ҳомий ва сармоядорларни таклиф этиш масаласи билан шуғулланади.

Шу тариқа Ўзбекистонда алоҳида хоккей, фигурали учиш ва шорт-трек, кёрлинг ҳамда чанғи спорти федерациялари вужудга келади. Улар таркибига, шунингдек, сноуборд, тоғ чанғи спорти, фристайл, трамплиндан сакраш каби спорт турлари ҳам киритилади.

Ўзбекистон Президентининг 2017 йил 5 декабрь куни эълон қилинган «Чорвоқ» эркин туристик зонасини ташкил этиш тўғрисида»ги фармонига кўра, Чимён тоғ ён бағрида яқин келажакда тоғ-чанғи курортини бунёд этиш режалаштирилмоқда, дейилади МОҚ хабарида. Бундан ташқари, пойтахт марказида бунёд этилаётган «Ҳумо» кўп тармоқли муз саройининг қуриб битказилиши ҳам қишки спорт турларининг ривожланишида муҳим аҳамият касб этади.

Ўзбекистон делегацияси қишки спорт турларида мақташга арзигулик натижаларга эриша олмаяпти. Норвегиянинг Лиллехаммер шаҳрида бўлиб ўтган ХVII қишки Олимпиада ўйинларида Лина Черязова томонидан қўлга киритилган олтин медаль эвазига, Ўзбекистон делегацияси қишки спорт турлари анчагина тараққий этган Белорус, Финляндия, Франция, Голландия, Хитой, Словения, Буюк Британия ва Австралия каби мамлакатларни ортда қолдириб, умумжамоа ҳисобида 67 мамлакат орасида 14-ўринни эгаллаганди.

Кейинчалик ҳам ўзбекистонликлар бирорта қишки Олимпиада ўйинларини ўтказиб юбормади. Бироқ уларда мамлакат спортчилари бошқа совринларга эга чиқа олмаганди.