Ижтимоий тармоқлар ва турли сайтларда маркази Жиззах вилоятида бўлган зилзила ҳақида маълумотлар тарқалди. Зилзила магнитудаси 3,5 баллни ташкил этгани ва кўпчилик ушбу силкинишни сезмагани таъкидланди. Бироқ инсон зилзила ва турли табиий офатлар вақтида шошиб қолади, ҳодиса пайтида нима қилишни билмайди. Ўзбекистон мусуломлар идорасининг расмий веб-сайти бу каби ҳолатларда нима қилиш кераклиги ҳақида маълумот берди.
Зилзила ҳақида аниқ маълумот берадиган тизим ҳали ишлаб чиқилмаган, шунинг учун ҳам қачон ва қаерда ҳамда қандай кучдаги зилзила рўй беришини олдиндан айтишнинг ҳозирча иложи йўқ.
Ислом динида мусулмон одам Аллоҳ таолони кўп зикр қилиши, шу билан бирга қилган хатоларига доим истиғфор айтиши керак. Зеро, инсон хатодан холи эмас.
Зилзила ҳақида Тақий Усмоний ўзининг «Мавсуъатул фиқҳийя» асарининг тўртинчи жилдида қуйидагича келтиради: «Зилзила Аллоҳ таолонинг оят ва аломатларидан ҳамда ноодатий ҳодисаларидандир. Ҳанафий, шофеий ва ҳанбалий мазҳаби уламолари зилзила содир бўлганда икки ракат намоз ўқиш мустаҳаб эканлигини айтадилар».
Имом Косоний ва Ибн Қудома раҳимаҳуллоҳлар Абдуллоҳ ибн Аббос розияллоҳу анҳу Басрада бўлган вақтларида зилзила сабабли намоз ўқиганларини нақл қилади. Имом Нававий раҳимаҳуллоҳ «Шарҳу Муҳаззаб»да Али розияллоҳу анҳудан зилзила бўлганда намоз ўқиш кераклиги ҳақидаги ривоятни келтирганлар.
Имом Косоний раҳимаҳуллоҳ айтадиларки: «Бу усул қўрқинчли ва даҳшатли ҳодисалар пайтида намоз ўқишлик лозимлигига асослангандир. Қуёш ва Ой тутилишида ўқиладиган намозларнинг асоси ҳам шудир».
Намознинг ўқилиш тартиби қуйидагича:
Бу намоз жамоат бўлиб эмас, балки якка ҳолда ўқилади. Бошқа намозлардан фарқли бўлмаган ҳолда икки ракат бўлиб, намоз ўқиш макруҳ бўлган вақтларда ўқилмайди. Намоздан сўнг дуога жидду жаҳд қилинади.
Изоҳ (0)