Ўзбекистонда қамоқдан озод қилинган собиқ маҳбусларга ижтимоий-ҳуқуқий ёрдам кўрсатилади. Бу Вазирлар Маҳкамасининг 5 декабрдаги қарорида назарда тутилган, деб хабар беради Norma.
2018 йил 1 апрелидан бошлаб собиқ маҳбуслар ўз хоҳишига кўра шундай ёрдам сўраб мурожаат этиши мумкин бўлади.
Мурожаат этган собиқ маҳбус ҳисобга қўйилади, унинг шахси, соғлиғи, маълумоти, ҳаётий вазияти ўрганилади, шундан сўнг минтақавий бандликка кўмаклашиш маркази томонидан унинг учун индивидуал дастур ишлаб чиқилади.
Дастурни тайёрлашда шахснинг қуйидаги ижтимоий-ҳуқуқий ёрдам турларига муҳтожлиги аниқланади:
- ишга жойлаштириш;
- тиббий хизматлар;
- ҳуқуқий ёрдам кўрсатиш, шу жумладан:
- юридик аҳамиятга эга ҳужжатларни расмийлаштириш;
- ижтимоий ёрдам ҳуқуқи, ижтимоий таъминот юзасидан юридик маслаҳат;
- касб-ҳунар тайёргарлиги бўйича ёрдам;
- агар шахснинг уйи бўлмаса — вақтинча яшаш жойини аниқлаш учун туман ёки шаҳар ҳокимиятига тегишли ҳужжатлар тайёрлаш;
- бошқа турдаги ёрдам.
Ёрдам олаётган шахс ойига бир марта тегишли бандликка кўмаклашиш марказига келиши лозим.
Изоҳ (0)