Ўзбекистон Президенти Шавкат Мирзиёев Олмазор туманида жойлашган Akfa Medline тиббиёт марказига ташриф буюрди, деб хабар берди ЎзА.
Мазкур тиббиёт маркази лойиҳаси жорий йилнинг 21 апрель куни тақдим қилинган бўлиб, Шавкат Мирзиёев уни замонавий асбоб-ускуналар билан жиҳозлаш, бу ерда юқори малакали мутахассисларнинг ишлашини ташкил қилиш бўйича топшириқлар берган эди. Ўтган вақт мобайнида қуриб фойдаланишга топширилган тиббиёт марказининг умумий майдони 2 гектар бўлиб, 5 блокдан иборат. 12 қаватли замонавий бино 160 ўринли стационарга эга.
«Хусусий тиббиётни ривожлантиришга фақат пойтахтда эмас, мамлакатимизнинг энг олис ҳудудларида ҳам катта эътибор қаратишимиз зарур. Бу ерда хусусий тиббиёт мутахассислари ўқувини йўлга қўйишимиз керак. Мазкур тиббиёт маркази хусусий секторни ривожлантириш бўйича асосий база бўлади. Корея Республикаси тажрибаси асосида кадрлар тайёрлаш тизимини йўлга қўйиш керак», — деди Шавкат Мирзиёев.
Тошкент авиация ишлаб чиқариш бирлашмаси собиқ профилакторийси ўрнида ташкил этилган мазкур тиббиёт маркази энг сўнгги русумдаги тиббий асбоб-ускуналар билан жиҳозланган. Кўп тармоқли марказда юқори малакали мутахассислар фаолият юритмоқда.
400 дан ортиқ иш ўрни яратилиб, чет давлатлардаги етакчи тиббиёт марказларида фаолият юритаётган ўзбекистонлик мутахассислар ҳам жалб қилинган. Марказда ультратовуш диагностикаси, терапия, гинекология, гастроэнтерология, диетология, физиотерапия, оториноларингология, урология, педиатрия, кардиология, офталмология, неврология, эндоскопия, ортопедия, хирургия, нейрохирургия каби йўналишларда хизмат кўрсатилмоқда.
Хусусий тиббиёт марказлари қанча кўп бўлса соҳада рақобат бўлади, рақобат бор жойда хизмат сифат юқори бўлиб, нарх арзонлашади. Бу эса энг муҳим жиҳатдир. Одамлар тиббиёт масканига унинг чиройли бинога қараб эмас, мутахассисларнинг юқори малакаси бўйича баҳо беради. Бу марказда малака оширган мутахассислар вилоятларга бориб аҳоли саломатлиги мустаҳкамлаш йўлида самарали меҳнат қилиши зарур.Шавкат Мирзиёев
Изоҳ (0)