29 ноябрь куни соат 9:30 да Афғонистоннинг Кам Air авиакомпанияси самолёти Тошкент халқаро аэропортига келиб қўнди. Бу ҳақда «Ўзбекистон ҳаво йўллари» МАК ахборот хизмати хабар бермоқда.
«Афғонистон бизга қўшни дўст давлат, фуқаро авиацияси бу икки давлат ўртасидаги икки томонлама муносабатларни ривожлантирувчи катализатор, иккала мамлакат маданияти ва иқтисодини боғловчи кўприк вазифасини ўтайди.
Агар илгари афғонистонлик йўловчилар Тошкентга Истанбул ёки Дубай орқали, 17 дан 32 соатгача вақт сарфлаб учиб келишган бўлса, эндиликда атиги бир ярим соатда тўғридан-тўғри Кобулдан Тошкентга учиб келиш имконияти пайдо бўлди.
Ислом Каримов номидаги Тошкент халқаро аэропорти Kam Air авиакомпанияси йўловчилари учун Германия, Буюк Британия ва Европанинг бошқа давлатларига учадиган қатновларда парвоз қилишлари учун туташтирувчи аэропорт вазифасини ўтайди», — дейилади хабарда.
Бундан ташқари, афғонистонлик учувчиларни Ўзбекистон Миллий авиакомпаниясининг учувчилар мактабида ўқитиш, шунингдек Uzbekistan Airways Technics авиакорхонасида Kam Air ҳаво кемаларига техник хизмат кўрсатиш юзасидан халқаро келишувлар ҳам имзоланди.
Биринчи қатновни амалга оширишдан олдин идоралараро ўзбек-афғон ишчи гуруҳи катта ҳажмдаги дастлабки тайёргарлик ишларини амалга оширди, хусусан хавфсизликни таъминлаш масалалари жойида ўрганилди. Ҳамид Карзай номидаги Кобул халқаро аэропортида йўловчиларни ҳаво кемасига чиқариш тартиб-таомиллари хавфсизлик бўйича барча халқаро авиация талабларига жавоб беради.
Бизнинг авиакомпания иккала пойтахт шаҳар ўртасида авиайўналиш очган Афғонистоннинг биринчи хусусий авиакомпанияси бўлганлиги билан фахрланамиз. Kam Air – Афғонистоннинг ўсаётган авиакомпанияси, унда юқори даражадаги ўз касбининг ҳақиқий усталари ишлашади. Биз «Ўзбекистон ҳаво йўллари» сингари ишончли ва техник жиҳозланган шундай авиакомпания билан ҳамкорлик қилаётганимиздан ғурурдамиз. Афғонистон ва Ўзбекистон ўртасида авиақатновларнинг тикланиши бу компаниянинг парвозлар географиясини кенгайтириш бўйича стратегиясининг бир қисмидир.Замари Камгар, Kamgar Group эгаси ва асосчиси, афғон бизнесмени
Маълумот учун, Афғонистондаги Ҳамид Карзай номидаги Кобул халқаро аэропортида жойлашган Kam Air авиакомпанияси 2003 йилда ташкил этилган. Kam Air мунтазам қатновларни амалга оширадиган портлар сирасига Деҳли, Машҳад, Теҳрон, Душанбе, Истанбул ва Жидда киради.
Изоҳ (0)