Ўзбекистоннинг Германиядаги элчихонаси кўмагида Ўзбекистон Республикаси президенти ҳузуридаги стратегик ва минтақавий тадқиқотлар Институти (СMTИ), Халқаро тадқиқотлар ахборот-таҳлил маркази (ХТАТМ), «Тараққиёт стратегияси» маркази, Жаҳон иқтисодиёти ва дипломатия университети, шунингдек, Ўзбекистон Республикаси Президенти ҳузуридаги Хавфсизлик кенгаши аппарати вакилларидан иборат делегация Берлин шаҳрида бўлиб турибди.
Сафардан мақсад — Ўзбекистон-Германия ўзаро манфаатли ҳамкорлигини кенгайтириш, 2017–2021 йилларга мўлжалланган ҳаракатлар стратегиясини амалга оширишнинг бориши тўғрисидаги ахборот, шунингдек, Президент Шавкат Мирзиёевнинг ташқи сиёсий ташаббусларини ГФРнинг сиёсий хулосалар ҳосил қилувчи, эксперт ва жамоатчилик доиралари эътиборига ҳавола этишдан иборат.
Ўзбекистон делегацияси федерал канцлернинг идораси, ташқи ишлар, иқтисодиёт ва энергетика, иқтисодий ривожланиш ва ҳамкорлик федерал вазирликларида, Шарқий Европа ва халқаро тадқиқотлар, Германия ташқи сиёсат фондида бир қатор музокаралар ва маслаҳатлашувлар ўтказди.
Германиялик ҳамкорлар Ўзбекистонда қабул қилинган Ҳаракатлар стратегиясини маъқуллади ва бу дастурий ҳужжатда белгиланган вазифаларни амалиётга жорий қилишда ҳар томонлама ёрдам беришга тайёр эканлигини билдирди.
Ўтказилган музокаралар якунига кўра, СMTИ ва ХТАТМ раҳбариятлари ва Германиянинг ҳукмрон партияси «ақл маркази» ва нуфузли тадқиқот муассасалари — Конрад Аденауэр фонди, Ф.Эберт фонди, Кавказ ва Каспий тадқиқотлари Европа институти билан меморандумлар имзоланди.
Ўзбекистон делегациясининг Германияга сафари давом этмоқда.
Изоҳ (0)