Жефф Безос яна дунёнинг энг бой одами деб топилди. Amazon асосчиси ва бош директорининг бойлиги 93,8 миллиард долларга баҳоланмоқда, деб ёзади InsiderPro.
Amazonнинг учинчи кварталдаги юқори даромади унга 6,44 миллиард доллар келтирди, шундан сўнг Безос Билл Гейтсдан биринчи ўринни олиб қўйди.
Amazon онлайн-гиганти асосчисига The Washington Post газетаси ва Blue Origin аэрокосмик компанияси ҳам тегишли.
Ушбу технологик магнатнинг иш куни қандай ўтади?
Безос табиий уйқу кучига ишонади. Тонгда будилниксиз, етарлича дам олганлигини ҳис қилганда уйғонади.
Миллиардернинг куни ҳар доим рафиқаси ёзувчи Маккензи Безос билан нонуштадан бошланади.
Безос рафиқаси ва тўрт нафар фарзандига етарлича ғамхўрлик қилиш учун ҳеч қачон эрта тонгдан учрашув белгиламайди.
Умуман олганда, у расмий йиғилишларни хуш кўрмайди. Amazon инвесторлари билан учрашувга йилига атиги олти соат ажратади.
Агар мажлисни четлаб ўтиш имкони бўлмаса Безос «иккита пицца қоидаси»ни қўллайди: мажлис иштирокчилари иккита пицца билан меҳмон қилиш мумкин бўлган миқдорда бўлиши керак, ундан ортиқ эмас.
Безос қўл остидагилари билан анча кескин муносабатда бўлади, бироқ у «хулқ-атворини юмшатиш» устида руҳшунос билан ишлаётгани ҳақидаги миш-мишлар тарқалган.
Amazon маданияти камтарлик ва тежамкорликка асосланган. Безос қўл остидагиларини массаж ва текин тушликлар билан жалб қилиш керак деб ҳисобламайди.
Безос ноодатий таомларни ёқтиради. Wооt асосчиси Мэтт Рутлеж билан учрашувда у картошка, бекон, яшил саримсоқли ёгурт ва тухумли саккизоёқ буюртма қилган — буларнинг барчаси нонуштага. «Менюга қараб ҳеч қандай таассуротим бўлмаган, тушунмайдиган ниманидир кўрдим, — дейди Безос. — Ва нима бўлишидан қатъий назар нонуштага саккизоёқ кераклигини ҳис қилдим».
Бундан ташқари, Безос ғилдиракдаги фастфудни хуш кўради. 2014 йилда у Business Insider бош редактори Генри Бложетга Amazon штаб-квартираси яқинидан топиш мумкин бўлган сон-саноқсиз бургер фургонлари ҳақида ҳикоя қилади. «Тўғрисини айтганда, вазият назорат остидан чиқиб кетаяпти», — дея тан олади миллиардер.
Безос тушликдан сўнг доим идишларни ювади.
У спорт билан шуғулланиш-шуғулланмаслиги номаълум. Яқинда интернетда бош директорнинг конференциялардан бирида олинган суратини муҳокама қилишди — ижтимоий тармоқ фойдаланувчилари Безоснинг яхши ташқи кўринишидан ҳайратланиб, уни ҳатто Вин Дизелга ўхшатди.
Amazon хусусий каналлари учун бир нечта оммабоп сериалларга продюссерлик қилади — масалан, «Баланд қўрғондаги одам» ва «Равшан». Бироқ компания бош директори ёшлигидаги асосий сериал — «Юлдузли йўл»га содиқ. У ҳатто «Cтартрек: Чексизлик» фильмида кўриниш берган.
Безоснинг яна бир космик қизиқиши бор: NASA эски ракеталарини қидириб, сув ости кемасида шўнғиш. Миллиардер кўпинча болаларини ҳам ўзи билан бирга олиб боради.
Безос режимга риоя қилади ва ҳар тунда саккиз соат ухлайди.
Изоҳ (0)