Самарқанд шаҳар ҳокими Фурқат Раҳимов Саттепо массивидаги уйлардан бирида истиқомат қилувчи ногироннинг ҳолидан хабар олди. Бу ҳақда Facebook’даги «Самарқанд ва самарқандликлар» гуруҳи аъзоси маълум қилди.
Унинг ёзишича, у ушбу воқеага Саттепода турадиган дўстиникига борган вақтда тасодифан гувоҳ бўлган. «Тўғрисини айтсам, шаҳар ҳокими келиб, ўзи биринчи марта кўриб турган одамдан ҳол-аҳвол сўраши мен учун ҳайратланарли ҳолат бўлди», — деб ёзади фойдаланувчи.
Мезбоннинг қўшнилари ҳокимнинг ташрифидан хабар топгач, у билан суҳбатлашиш учун ҳовлига чиққан. Фурқат Раҳимов Саттепо массиви бўйича бўлғуси режалар ҳақида гапирган. Ҳокимнинг сўзларига кўра, кўп қаватли уйларда яшаш учун қулай шароитлар яратиш борасида «Шинам уй» шиори остида режалар амалга оширилади. «Шинам уй» дастури кўп қаватли уйлар ҳовлиларини кўкаламзорлаштириш, болалар ва спорт майдончаларини қуриш, китоб бурчагини яратиш ва бошқаларни ўз ичига олади.
«Айнан бизнинг шаҳримиз ҳокими ана шундай ғамхўр эканлигидан фахрланиб кетдим», — деб ёзади фойдаланувчи.
Изоҳ (0)