Хоразм вилояти ҳокими ўринбосари Шакаржон Хўжаниёзова вафот этди

Хоразм вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Шакаржон Хўжаниёзова вафот этди. Бу ҳақда 28 октябрь куни «Kun.uz» хабар берди.

1955 йилда Хоразм вилояти Боғот туманида туғилган Шакаржон Хўжаниёзова 2017 йил 25 январидан бошлаб вилоят ҳокими ўринбосари лавозимида ишлаб келаётган эди.

Бунгача у Хоразм вилояти ҳокимининг ташкилий, иқтисодиёт ва ижтимоий ривожлантириш масалалари бўйича биринчи ўринбосари, вилоят Хотин-қизлар қўмитаси раиси, шунингдек, Боғот туман ҳокими лавозимида меҳнат қилган.

Хўжаниёзова хоним иш фаолиятини 1977 йил Боғот туман жамоа хўжалиги ҳисобчилигидан бошлаган бўлиб, кейинчалик тумандаги 6-сонли ўрта ҳунар-техника билим юрти директори ўринбосари, сўнгра директори бўлиб ишлаган.

У 1998 йили «Меҳнат шуҳрати» ордени, 2004 йили «Ўзбекистонда хизмат кўрсатган қишлоқ хўжалиги ходими» фахрий унвонлари билан мукофотланган.