Астрономлар башорат қилишларича, Ер аҳолиси 21 октябрга ўтар кечаси юлдузлар ёғдусини кўриши мумкин: Орион юлдузлар туркумидаги метеорлар оқими — Орионидлар ўзининг максимумига эришади. Бу ҳақда Москва планетарийсига асосланиб, «News.mail.ru» хабар берди.
Ноёб ҳодиса Ер атмосферасига Галлей кометасининг «парчалари» қулаши туфайли юз беради. Сўнгги бор у Ер сайёраси ёнидан 1986 йилда учиб ўтган. Ундан ажралган зарралар ҳар йили Ер атмосферасига тушади ва метеор оқимларини ҳосил қилади: баҳорда — Май Акваридлари, кузда — Орионидлар.
Маълумотларига кўра, «ерга тушаётган ёрқин юлдузларнинг» максимумини (соатига 15—20 та) 21 октябрь, шанбага ўтар кечаси кўриш мумкин. Шуниндек, таъкидланишича, Ой уларни кўришга халақит бермайди.
Одатда Орионид зарралари сониясига 66 километр тезликда ҳаракатланиб Ер атмосферасига киради. Улар оқ, қизил, кўк-яшил, сариқ ва тўқ сариқ рангда бўлади.
Изоҳ (0)