«Ўзбекистон темир йўллари» матбуот хизмати Сергели ва Юнусобод туманларидаги метро қурилиши ишлар жадаллик билан бораётганини маълум қилди, деб ёзади «Nuz.uz».
«17 октябрь ҳолатига кўра, Сергели тармоғи лойиҳасида кўзда тутилган таянч устунларининг 108 таси остига котлованлар қўйиб чиқилган, 75 та таянч устунининг пойдевори бетонланган, 70 жуфт таянчнинг конструкцияси арматураланган ва бошқа турдаги ишлар бажарилган. Бундан ташқари, эстакада (осма кўприк) таянчларидаги 19 та ригел монтаж қилинган (лойиҳада жами 174 таси кўзда тутилган)», — дея аниқлик киритишди.
Иккита сменада ташкил қилинган қурилиш ишларида 100 дан ортиқ киши меҳнат қилмоқда, 25 тадан ортиқ замонавий қурилиш техникаси жалб қилинган. Лойиҳада 7,1 км йўл қурилиши режалаштирилган. Унда 6 та ер усти бекати жойлашади.
Тошкент метросининг Юнусобод йўли иккинчи босқичи қурилиши ҳам шундай жадал суръатларда бормоқда. Қурилиш ишларида 90 га яқин киши, 18 та машина ва механизмлар қатнашмоқда. Кўзда тутилган 254,2 минг кубометр ҳажмдаги қазиш ишларининг 245 минг кубометри амалга оширилди. Мавжуд туннелнинг бириккан қисмига котлован маҳкамлаш ишлари олиб борилмоқда.
Изоҳ (0)