Ўзбекистонда жиноятчилик ва ҳуқуқбузарликларнинг олдини олиш учун жамоат жойларида кузатув камералари ўрнатилади
Аввал хабар қилинганидек, Урганч шаҳрида халқ депутатлари Хоразм вилояти кенгашининг навбатдан ташқари сессияси бўлиб ўтди. Унда Ўзбекистон Президенти Шавкат Мирзиёев нутқ сўзлади, деб хабар беради ЎзА.
Шавкат Мирзиёев сессиядаги чиқиши чоғида ички ишлар органлари фаолияти самарадорлигини оширишга қаратилган ислоҳотларни янги босқичга олиб чиқиш зарурлигини билдирди ва вилоятни жиноятлардан бутунлай холи ҳудудга айлантириб, бу борада Хоразм тажрибасини яратишни таклиф этди.
Шу мақсадда ички ишлар вазирлигига вилоят ҳокимлиги билан биргаликда бир ой муддатда Хоразм вилоятида «Хавфсиз ҳудуд концепцияси»ни ишлаб чиқиб, Вазирлар Маҳкамасига киритиш топширилди.
Давлат раҳбари бу муҳим лойиҳани нафақат шаҳарлар, балки туманларда ҳам самарали амалга ошириш учун айрим долзарб масалаларга тўхталиб ўтди. Жумладан:
Туман ва шаҳар ички ишлар бўлимлари тузилмасини танқидий қайта кўриб чиқиб, ходимларнинг асосий қисми посёлка ва қишлоқ аҳоли пунктларига яқин жойларда фаолият юритишини таъминлаш;
Ҳар ойда профилактика инспекторлари ва маҳалла раислари кўчама-кўча юриб, фуқаролар билан учрашиб, жиноят ва ҳуқуқбузарликларнинг олдини олиш борасида амалга оширилаётган ишлар юзасидан ҳисобот бериб бориши.
Профилактика инспекторлари бундан буён ички ишлар органларининг маҳалладаги вакили эмас, балки маҳалланинг ички ишлар органларидаги вакили сифатида ўз ишини ташкил этиши, авваламбор маҳалланинг манфаатини биринчи ўринга қўйиши лозим;
Ўз ҳудудида яшайдиган фуқаролар томонидан жиноят содир этилишига йўл қўймаган маҳалла раиси ва профилактика инспекторига ойлик иш ҳақининг 30 фоизи миқдорида мукофот пули бериш ва, аксинча, жиноят содир этишга йўл қўйилган тақдирда эса уларга нисбатан ойлик маошининг 30 фоизи миқдорида жарима қўллашни назарда тутадиган тартибни ишлаб чиқиш ва амалга татбиқ этиш;
Жиноятчилик ва ҳуқуқбузарликларнинг олдини олиш мақсадида жамоат жойлари ва аҳоли турар жойларида кузатув камералари ўрнатилишини ташкил этиш. Бош вазирнинг биринчи ўринбосари А. Раматовга ички ишлар вазирлиги, ахборот технологиялари ва коммуникацияларини ривожлантириш вазирлиги билан биргаликда, бир ой муддатда ички ишлар органлари фаолиятига замонавий ахборот-коммуникация технологияларини кенг жорий этиш, жамоат жойларида кузатув камераларини ўрнатиш бўйича аниқ чора-тадбирлар дастурини ишлаб чиқиш юзасидан кўрсатма берилди.
