Сурияда ИШИД террорчилик гуруҳи сафларида жанг қилган «Оқ бева» лақабли британиялик Салли Жонс Америка учувчисиз қурилмасининг Раққага ҳужуми чоғида йўқ қилинди, деб ёзади «ТАСС» Times газетасига таяниб.
Газетанинг Британия ҳукуматидаги манбасига кўра, Салли Жонс ва унинг ўғли ҳалок бўлган деган тахмин тўғри чиққан. «Оқ бева» билан биргаликда унинг 12 ёшли ўғли ҳам вафот этган. Жонс қамалдаги Раққадан қочишга уринаётган пайтда Америка ҳарбийлари зарба берган. Times қайд этишича, британиялик аёл сўнгги йилларда Бирлашган Қиролликнинг ташқи разведкаси — МИ-6 томонидан кузатиб келинган.
Тўрт йил аввал Кент графлигида Krunch рэп гуруҳи таркибида қўшиқ куйлаган,икки боланинг онаси бўлган 45 ёшли аёл кутилмаганда ўзидан икки баробар ёш бўлган бирмингемлик мусулмон йигитга турмушга чиқиб, Сурияга кетган. Исломни қабул қилгач, Салли ИШИДнинг Европа мамлакатларидаги бош аскар ёлловчиси бўлган эрига ёрдамчилик қила бошлаган. Аёл Раққага кичик ўғлини ҳам ўзи билан бирга олиб кетган, у видеороликлардан бирида сариқ сочли жаллод ролида чиққач, «машҳур» бўлиб кетганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)