Континентал Хоккей Лигасида Ўзбекистон жамоаси пайдо бўлиши мумкин. Бу ҳақда «Оламспорт» Россия матбуотига таяниб хабар берди.
Шу йилнинг январь ойи Тошкентда «Хумо Арена» муз саройининг қурилиши бошланганди. Режага кўра, сарой 2018 йилнинг куз ойида фойдаланишга топширилиши мумкин. Бу эса «Бинокор» хоккей клубининг тўлиқ тикланишига сабаб бўлади.
12 минг томошабинни ўз бағрига сиғдира оладиган «Хумо Арена»да уй учрашувларини ўтказадиган «Бинокор», 2019 йил КХЛ аъзосига айланса, 7 мамлакатнинг 27 хоккей клубларига қарши шайба суриш имкониятига эга бўлади.
КХЛда 7 мамлакат клублари бор: Россия, Беларусь, Қозоғистон, Латвия, Хитой, Финляндия, Словакия. Йил якунларига кўра, 27 та клубдан 3 таси лигани тарк этади.
«Бинокор» хоккей клубини катта эҳтимол билан Eriell компанияси молиялаштириши мумкин, дейилади хабарда.
Тошкентнинг «Бинокор» хоккей клуби 1973—1988 йилларда Собиқ Иттифоқ чемпионатининг Биринчи Лигасида иштирок этган.