Россиянинг иккита стратегик бомбардимончи самолётлари 3 май куни АҚШнинг Аляска штати яқинида синов парвозини амалга оширган. Бу ҳақда “ТАСС” нашри хабар берди.
Манбада айтилишича, Ту-95МС русумли самолётлар Алясканинг ғарбий соҳиллари яқинида парвоз қилган. Рус расмийлари парвозлар Беринг бўғозининг бетараф сувларида амалга оширилганини билдирган.
3 май куни Россия Мудофаа вазирлиги АҚШ яқинида бомбардимончи самолётлар учирилгани ҳақидаги хабарни расман тасдиқлаган. Манбага кўра, парвозда бир қанча хорижий мамлакатлар ҳаво кемалари ҳам иштирок этган.
“Россия аэрокосмик кучларининг иккита Ту-95МС стратегик ракета ташувчи бомбардимончи самолётлари Алясканинг ғарбий қирғоқлари яқинида, Беринг денгизининг нейтрал сувлари устидаги ҳаво ҳудудида режали парвозни амалга оширди. Парвоз 11 соатдан ортиқ давом этди. Аэрокосмик кучларнинг Су-30СМ самолётлари экипажлари қирувчи самолётларга ёрдам кўрсатди”, — дейилган Россия Мудофаа вазирлиги эълон қилган баёнотда.
Россиянинг узоқ масофали бомбардимончи самолётлари мунтазам равишда Арктиканинг нейтрал сувлари, Шимолий Атлантика, Қора ва Болтиқ денгизлари, шунингдек, Тинч океани устидан парвозларни амалга ошириши маълум қилинган. Бу сафарги синов парвозларида олдингиларидан фарқли равишда, хорижий мамлакатлар ҳаво кучлари иштирок этгани таъкидланди. Вазирлик бу кучлар айнан қайси мамлакатларга тегишли эканлиги ҳақида маълумот тақдим этмаган.
“Россия Аэрокосмик кучларининг самолётлари барча парвозларни ҳаво ҳудудидан фойдаланишнинг халқаро қоидаларига қатъий риоя қилган ҳолда амалга оширади”, — дейилган расмий хабарда.
Изоҳ (0)