Миср Россия—2018 мундиалида иштирок этиш ҳуқуқини қўлга киритди. Бунга қадар Африка қитъасидан Нигерия шундай бахтга сазовор бўлганди.
Саралашнинг 5-турида Миср ўз майдонида Конгони қабул қилиб, 2:1 ҳисобида зафар қучди. 63-дақиқада Муҳаммад Салоҳ ҳисобни очган бўлса, 87-дақиқада конголик футболчилар мувозанатни тиклашга муваффақ бўлганди. Аммо бу ҳолат Салоҳни қаҳрамонликдан мосуво қила олмади. «Ливерпуль» ҳужумчиси 90-дақиқадаги голи билан мисрликларни Россия мундиали сари етаклади.
Сўнгги тур қандай ҳисоб билан якун топса-да, бу Мисрнинг натижасига таъсир кўрсатмайди. Бир кун олдин «Арсенал» ҳужумчиси Алекс Ивобининг Замбия дарвозасига урган голи Нигерия жонига оро кириб, улар ҳам ЖЧ—2018 чиптасига эга чиққанди.
ЖЧ—2018 да иштирок этиши аниқ бўлган мамлакатлар:Россия, Бразилия, Эрон, Япония, Мексика, Бельгия, Жанубий Корея, Саудия, Германия, Англия, Испания, Нигерия, Коста-Рика, Миср, Польша.
Изоҳ (0)