Гарвард университети The Wall Street Journal ҳамда Британиянинг Times Higher Education журналлари томонидан эълон қилинган энг яхши университетлар рейтингида биринчи поғонани эгаллади, деб хабар берди «ТАСС».
Рўйхатдан иккинчи ўринни Нью-Йоркдаги Колумбия университети, учинчиликни эса Массачусетс технология институти ва Стенфорд университети банд этди.
Шунингдек, топ-10 ликдан Дьюк университети, Йель университети, Калифорния технология институти, Пенсильвания университети, Принстон университети ҳамда Корнелль университети ўрин олди.
Рейтингни тузишда 15 та турли омиллар, жумладан, битирувчиларнинг даромадлари, ҳар бир университетнинг академик ресурслари, ўқитувчи ва талаба ўртасидаги ўзаро муносабат даражаси, шунингдек, таълим муассасаларидаги кўп маданиятли муҳит инобатга олинади.
Жорий йилдаги рейтингни тузишда 109 минг талаба орасида ўтказилган сўров натижалари ҳам эътиборга олинган. Уларнинг ўқув жараёнига қанчалик чуқур шонғиб кетганликларини аниқлаш учун 7 тадан савол берилган.
Ушбу рейтинг кенг кўламли саволларни ўзида жамлаган бўлиб, бунга нафақат ота-оналар, балки бўлажак талабалар ҳам эътибор қаратишлари лозим. Уни тузишда алоҳида аҳамият молиявий томонларга қаратилган. Бундан ташқари, университет битирувчиси қанча маош олиши мумкинлиги, шунингдек, таълим муассасаларидаги академик имкониятларга катта эътибор берилган. Жорий йилдаги рейтингни тузишда талабаларнинг курс давомида қарзи ва ундан қутилиш имконияти омиллари ҳам ҳисобга олинди.Дэйв Петтит, The Wall Street Journal муҳаррири
Изоҳ (0)