Саудия Арабистони подшоҳи Салмон ибн Абдулазиз ас-Сауд аёлларга ҳайдовчилик гувоҳномаси олиш ва автомобиль бошқаришга рухсат берувчи фармонни имзолади. Шу вақтгача Саудия аёллар машина ҳайдаши ман этилган дунёдаги ягона давлат бўлиб келаётган эди, дея хабар беради Meduza.
Фармони олийга кўра, аёлларга 2018 йил июнидан бошлаб ҳайдовчилик гувоҳномалари берилиши бошланади. Бу жараён қай тарзда амалга оширилиши, эркаклар топширадиган имтиҳондан фарқланиши ёки йўқлиги ҳозирча мавҳум бўлиб турибди.
Саудия Арабистони расмийлари аёлларнинг автомобиль ҳайдашига нима сабабдан рухсат беришга қарор қилгани маълум эмас.
Саудия Арабистонида аёлларнинг машина ҳайдашига нисбатан тақиқ 1957 йилдан бери амал қилиб келаётган эди. Тақиқнинг бузилиши бир неча бор ҳибсга олиш ва бошқа маъмурий чоралар билан жазоланган. Аёлларга фақат умумий трассаларда автомобиль ҳайдаш тақиқланган, хусусий уй-жой ҳудудида уларнинг рулга ўтиришига рухсат бор эди.
Саудия Арабистонида аёлларнинг машина ҳайдашига нисбатан жорий этилган тақиққа қарши бир неча бор норозилик намойишлари бўлиб ўтган. 2014 йили ҳуқуқ ҳимоячиси Луожан Хатлул тақиққа норозилик рамзи сифатида Саудия ҳудудига автомобилда киришга уринган, оқибатда 73 кун ҳибсда ўтириб чиққан.
Изоҳ (0)