Сўнгги 10 кун давомида Олий Лига ўйинларини бошқарган икки ҳакам «2» баҳога лойиқ кўрилганди. Рустам Бобомуродов бунинг учун футболдан четлаштирилган бўлса, Олим Толибжоновга ҳеч қандай чора кўрилмаганди.
«Championat.asia» Олим Толибжонов нима сабабдан паст баҳо олганини таҳлил қилиб чиқди. Хулосани эса мухлислар, мутахассислар ва экспертлар гуруҳига қолдирди. Нашр бунда баҳсли вазият деб, 4 та ҳолатни танлаб олган. Қолган эпизодларда ҳакам нейтрал кўринишда бўлган.
Қоида бўйича гол тўғри киритилганми?
Видеода «Шўртан» футболчиси Лазиз Убайдуллаев гол урган вазиятга эътибор беринг. «Навбаҳор» дарвозабони жарима майдончаси ташқарисида (балки ичкарисида, ҳар ҳолда аниқ бир гап айтиш қийин) тўпни қўли билан уриб юборди. Ҳакам жарима тўпи белгилади ва дарвозабонга сариқ карточка кўрсатди. «Шўртан» футболчиси тўпни нуқта томон думалатиб келиб, шу заҳоти ўйинни бошлаб юборади ва ҳужум гол билан тугади. Хўш, бу вазиятда урилган гол тўғрими? Ҳакам сариқ карточка кўрсатганидан кейин ўйин ҳуштаккача тўхтаб туриши керакмасмиди?Тўп қўлга текканми?
Бу вазият иккинчи таймда рўй берган. «Шўртан» футболчиси Лазиз Убайдуллаев ўнг қанотдан тўпни ерлатиб жарима майдончаси ичига узатди. «Навбаҳор» ҳимоячиси Мирзоҳид Ғофуров йиқилаётиб, тўпни қайтариб юборди. Савол: Мирзоҳид Ғофуров бу вазиятда тўпни қўли билан қайтарганми? Видеони кўринг ва ўзингиз хулоса чиқаринг.Пенальти борми ёки йўқ?
Тўп билан ҳаракат қилаётган Игорь Таран уч футболчи орасидан жарима майдончасига кириб келди. «Навбаҳор» футболчиси ундан тўпни олиб қўйишга уринди. Савол: рақиб ўйинчиси Таранни йиқитдими? Вазиятни кўринг ва ўзингиз баҳо беринг.Ҳакам ўйинни тўхтатиши керакмиди ёки йўқ?
Энг кўп мунозарага сабаб бўлган ҳолат 87-дақиқада рўй берди. Ҳакам «Шўртан» дарвозаси томон жарима зарбаси белгилади. Тўп ҳаволатиб жарима майдони ичига оширилгач, «Шўртан» ҳимоячиси Обид Жўрабоев ўз жамоаси дарвозабони билан тўқнашиб кетиб, ерга йиқилди. Хавфни бартараф этиш мақсадида ғузорлик бошқа футболчи тўпни жарима майдончаси ташқарисига тепиб юборди. Бироқ ҳакам ўйинни шу нуқтада тўхтатмади, ваҳоланки, орқасига қараб, жароҳатланган футболчини кўрди.Меҳмонлар эса ўйинни давом эттирди. Мазкур ҳужум гол билан тугади. Шу гол сабаб наманганлик футболчилар ҳисобни тенглаштирди — 3:3. Энди савол туғилади: футболчи жароҳат олиб ерда йиқилиб ётган маҳал ҳакам ўйинни тўхтатиши керакмиди? Обид Жўрабоев жиддий жароҳат олган ва стадионнинг ўзиданоқ тез ёрдам машинасида касалхонага олиб кетилган. Бу ҳақда учрашув протоколида ҳам келтириб ўтилган ва тасдиқ сифатида «Шўртан» шифокори Алишер Абдураҳмонов имзо чеккан.
«Навбаҳор» фейр плейга амал қилиши керакмиди, деган савол ҳам юзага келиши мумкин. Ҳимояланаётган жамоа футболчиси тўпни тепиб воқеа жойидан узоқлаштирдими, демак, ҳакам ҳуштак чалиб, ўйинни тўхтатиши керак. Чунки жарима майдончаси ичида бошқа бир футболчи жароҳат олиб ерда ётибди.
«Championat.asia» мазкур вазият юзасидан тушунтириш берадиган тажрибали ҳакам ёки мутахассис фикри кераклиги ҳақида айтиб, Ўзбекистон футболида ишлайдиганларга умумий мурожаат қилган. Рустам Бобомуродовни футболдан четлаштириш масаласини кўриб чиққан ҳакамлар ҳам, қолганлар ҳам ҳозирча жим.
Изоҳ (0)