Рио–2016 Олимпия ўйинлари чемпиони, ўзбекистонлик боксчи Фазлиддин Ғоибназаров АҚШнинг Аризона штати Тусон шаҳрида фаолиятидаги учинчи жангида рақиби устидан ғалаб қозонди. Бу ҳақда «Оламспорт» хабар бермоқда.
Унинг рақиби мексикалик Виктор Росас бўлди. Саккиз раундга белгиланган жанг очколар ҳисобига кўра аниқланди.
Тони Зайно ҳакамлик қилган жангда ўзбекистонлик боксчи очколар ҳисоби бўйича рақибини мағлубиятга учратди. Крис Уилсон, Деннис O’Коннел ва Рубин Рокки Тейлор бир хил 80:72, 80:72, 80:72 ҳисобида ғалабани Ғоибназаровга тақдим этишди.
10 октябрь куни 30 ёшга тўладиган Росас профи рингда бугунгиси билан ҳисоблаганда 16 та жанг ўтказган бўлиб, уларнинг 9 тасида ғалабага эришган. Учта жангини нокаут билан якунлаган. Мағлубиятлари сони 7 тага етди. Фазлиддин эса профессионал боксдаги учинчи ғалабасини тантана қилди.
Эслатиб ўтамиз, Фазлиддин Ғоибназаров машҳур промоутер Боб Арумга тегишли Top Rank промоутерлик компанияси байроғи остида ўз жангларини ўтказиб келяпти.
Эътиборлиси, Ғоибназаровнинг навбатдаги жанги қачон, қаерда ва ҳатто кимга қарши ўтказилиши ҳам маълум бўлди. Унга кўра, боксчи 9 декабрь куни АҚШнинг Нью-Йорк шаҳридаги ўз бағрига 5 500 томошабинни сиғдира олувчи муҳташам Мadison Square Garden аренасида рингга кўтарилади.
Фазлиддиннинг профессионал рингдаги тўртинчи рақиби мексикалик Алексис Дель Боске бўлади. 22 ёшли Боске фаолияти давомида 17 та жанг ўтказиб, шуларнинг 13 тасида ғалабага эришган. Тўққизта жангда рақибларини нокаутга учратган. Тўрт бор мағлуб бўлган. Битта жангда нокаутга учраган.
Изоҳ (0)