2017 йилнинг 22 сентябрь куни Нью-Йорк шаҳрида 7 апрель куни Тошкентда имзоланган келишувга биноан Марказий Осиёнинг бешта мамлакати ТИВ раҳбарлари навбатдаги учрашувни ўтказди. Бу ҳақда ТИВ матбуот хизмати хабар бермоқда.
Қозоғистон, Қирғизистон, Тожикистон, Туркманистон ва Ўзбекистон Республикаси ташқи сиёсат идоралари раҳбарлари томонидан Марказий Осиё минтақасидаги ҳамкорликнинг долзарб масалалари, жумладан халқаро ва минтақавий ташкилотлар доирасидаги мавзулар муҳокама қилинди, шунингдек, мавжуд муаммоларни конструктив тарзда ҳал қилиш йўллари юзасидан фикр алмашилди.
Абдулазиз Комилов ўз нутқида ҳамкасбларига БМТ Бош Ассамблеясининг 72-сессиясида Ўзбекистон Республикаси Президенти Шавкат Мирзиёевнинг 19 сентябрдаги нутқининг асосий қисмлари ҳақида маълумот берди. Давлат раҳбарининг Марказий Осиё мамлакатлари ўртасидаги ҳамкорликни мустаҳкамлашга қаратилган аниқ ташаббусларига алоҳида эътибор қаратилди.
Томонлар 2017 йилнинг ноябрида Самарқанд шаҳрида «Марказий Осиё: ягона тарих ва умумий келажак, барқарор ривожланиш ва тараққиёт йўлидаги ҳамкорлик» юқори даражадаги халқаро конференцияни ўтказиш бўйича Ўзбекистон ташаббусини қўллаб-қувватлади.
Учрашув иштирокчилари Марказий Осиё умумий саъй ҳаракатлар натижасида тинчлик, барқарор ривожланиш ва дўстона қўшничилик ҳукм сурадиган минтақа бўлишидан манфаатдор эканликларини ва турли даражалардаги мунтазам учрашувларнинг ўзаро фойдали эканлигини тасдиқлади.
Изоҳ (0)