Россияда ЙТҲдан сўнг Ўзбекистон фуқароси қўлга олинди: у ҳайдаган машина ўғирланган, юкхонасида ўлик бўлган

Россиянинг Ленинград вилояти Ропша шаҳарчасида 23 сентябрь оқшомида йўл-транспорт ҳодисасини расмийлаштириш вақтида машиналардан бирининг юкхонасидан ўлик аёлнинг жасади топилди. Meduza’нинг Тергов қўмитасига асосланиб хабар беришича, машина ўғирланган бўлган. Ҳайдовчи қўлга олинган.

Машина ҳудудда истиқомат қилувчи аёллардан бирига тегишли бўлган. Юкхонада айнан ўша аёлнинг жасади бўлганми ёки бошқа — Тергов қўмитаси бунга аниқлик киритмаган. Ҳодиса юзасидан қотиллик моддаси бўйича жиноят иши қўзғатилган.

47news нашри маълумотларига кўра, 23 сентябрь куни тонгда Hyundai Creta русумли автомобилда ҳудудда истиқомат қилувчи Ольга Точёних қўзиқорин тергани ўтиб кетган. У кеч тушганидан сўнг уйга қайтмагач, эри Дмитрий ва ўғли Александр уни излаб йўлга чиққан.

Ота-ўғил Ропшада Hyundai’ни кўрган, бироқ автомобиль рулида уларга номаълум эркак ўтирган бўлган. Улар машинани қувлашга киришган ва оқибатда ЙТҲ юз берган. Кейинроқ автомобиль юкхонасида Ольга Точёнихнинг жасади борлиги маълум бўлган.

47news’нинг хабар беришича, қўлга олинган шахснинг исми Зуҳриддин Бўриев, у — Ўзбекистон фуқароси.