Ўзбекистон футбол федерацияси президенти Умид Аҳмаджонов ва ташкилот Ижроия қўмитаси аъзоси Бобур Шодиев бугун — 21 сентябрь куни Швейцариянинг Цюрих шаҳрида ФИФА президенти Жанни Инфантино билан учрашди. Бу ҳақда ЎФФ матбуот хизмати хабар берди.
ФИФА қароргоҳида бўлиб ўтган музокаралар якунига кўра, ЎФФ президенти Умид Аҳмаджоновнинг таклифи билан Жанни Инфантино Ўзбекистонга ташриф буюришга ваъда берди. Ташриф қачон амалга ошиши борасида ҳозирча аниқ маълумотлар йўқ.
Умид Аҳмаджонов ФИФА таснифидаги халқаро тадбир ва мусобақаларни Ўзбекистонга олиб келиш мақсадида Швейцарияга боргани айтилган. Ўзаро суҳбатда ўсмирлар ҳамда ёшлар ўртасидаги Жаҳон Чемпионати, шунингдек, ёш қизлар ўртасидаги кичик мундиалларни Ўзбекистонда ўтказиш масаласи қизғин муҳокама қилинган.
ЎФФ бунга қадар ҳам бу кичик мундиалларни Ўзбекистонда қабул қилиш масаласини кўриб чиққан ва ФИФАга таклиф юбориб, ўз номзодини илгари сурганди. Аммо кейинчалик Ўзбекистон томони бунга тайёр эмаслиги ойдинлашганди.
Музокаралар чоғида Ўзбекистон делегацияси футбол тарғиботини кучайтириш мақсадида ФИФАдан дунё футболининг ёрқин афсоналари ва бугуни кун юлдузларини Ўзбекистондаги ёш футболчиларга мастер-класс ўтаб бериши, шунингдек, топ-мураббийлар Ўзбекистонда назарий ва амалий машғулотлар ўтказиб беришини таъминлашда ФИФАдан амалий ёрдам беришини сўради. Бундан ташқари, Европанинг кўзга кўринган футбол клублари ва Ўзбекистон жамоалари ўртасида ҳамкорликдаги ўқув-машғулот йиғинларини ўтказиш ва мутахассисларни жалб қилган қолда, ўзаро тажриба алмашинувини йўлга қўйиш бўйича икки томонлама келишувга эришилгани айтилди.
Умид Аҳмаджонов Швейцария сафари учун Ижроқўм аъзоларидан нима сабабдан айнан Бобур Шодиевни танлаб олгани очиқланмаган. Қайд этиш керак, у ЎФФ президенти бўлгунига қадар, «Пахтакор» президенти Бобур Шодиевга вице-президент сифатида ишлаб келаётганди.
«Пахтакор» матбуот хизмати Умид Аҳмаджонов жамоадан расман кетгани борасида ахборот бериб улгурмаган. Бобур Шодиевнинг эса «Пахтакор»даги президентлиги давом этмоқда. «Бобур Кабулович бундан буён ЎФФ ижроқўми аъзоси сифатида ўзбек футболини ривожлантиришга ўз ҳиссасини қўшишга интилади», — деб ёзганди «Пахтакор» матбуот хизмати.
Изоҳ (0)