Мияни чиниқтирадиган кўпчилик машқлар амалий жиҳатдан фойда келтирмайди. Мияни ҳақиқатан ҳам чиниқтириш учун нейропластикликни ошириш керак.
Фото: «Лайфхакер»
Невролог Генри Манке нейропластикликни ошириш учун доимий равишда мияни ишлатиш ва унга янги вазифалар бериш керак деб маслаҳат беради.
Янги мураккаб кўникма ишлаб чиқишни бошланг
Манкенинг айтишича, бир хил ҳаракатларни такрорлаш мия ишини тезлаштиришга ёрдам берса ҳам, нейропластикликни ошириш учун етарли эмас экан. Масалан, сиз ўн йил давомида кроссвордлар ечиш билан шуғуллансангиз ҳам, бу мияга фойда бермайди. Бутунлай бошқасини синаб кўринг, масалан мусиқа асбобида чалишни, ва бу машғулот билан ҳафтасига ҳеч бўлмаса 2–3 соатдан шуғулланинг.
Уйга бошқа йўл билан боринг ва атрофдаги ҳамма нарсаларга эътибор беринг
Мияни чиниқтиришнинг яна бир усули — бу саёҳат. Сафардаги ҳамма нарса, нон сотиб олишдан тортиб, меҳмонхона йўлини излашгача янги ва қизиқарли бўлиб кўринади. Агар тез-тез саёҳат қилишнинг имкони бўлмаса, ишдан уйгача бошқа йўл билан боринг. Ўзингиз ўрганиб қолган дўконга эмас, балки бошқасига киринг, севимли боғингизга бошқа йўлдан киринг, ҳар хил овозларга ва ҳидларга эътибор беринг, яшаш жойингизнинг хаёлий харитасини кенгайтиринг.
Бир неча кундан кейин, сиз юрадиган янги йўл таниш бўлиб қолгандан кейин, яна йўналишни ўзгартиринг. Бу миянинг ўрганиш ва хотирага жавоб берадиган соҳаси — гиппокампни фаоллаштиради.
Кўпроқ ҳаракат қилинг ва яхши овқатланинг
Агар бутун кучни юқори қон босими ва шу каби бошқа касалликларга сарфлашга тўғри келадиган бўлса, организм учун фикрлаш қобилиятининг ўткирлигини сақлаб туриш қийин бўлади. Шунинг учун тўғри овқатланишга ҳаракат қилинг ва фаол ҳаёт тарзини олиб боринг, масалан мунтазам равишда сайр қилишга ёки югуришга чиқинг.
Изоҳ (0)