Ўзбекистондаги ҳар бир шаҳар-туманда 2018—2019-ўқув йилидан бошлаб мактабгача ва умумий ўрта таълим соҳасида хизмат кўрсатадиган камида биттадан муассаса очилади. Бу Ўзбекистон Президентининг «Нодавлат таълим хизматлари кўрсатиш фаолиятини янада ривожлантириш чора-тадбирлари тўғрисида»ги қарорида кўзда тутилган, дея хабар беради «Газета.uz».
Қарор шарҳида қайд этилишича, ривожланган давлатларда умумий ўрта таълим соҳасида нодавлат таълим улуши юқори бўлиб, Германияда 12, Францияда 17, АҚШда 18, Буюк Британияда 20, Испания, Ирландия ва Голландияда эса 30 фоизни ташкил этади.
Ўзбекистонда эса нодавлат мактабларининг халқ таълим тизимидаги улуши 0,4 фоизни ташкил этади (9680 тага 43 та). Уларнинг ярмидан ортиғи — 27 таси Тошкент шаҳрида жойлашган, Қорақалпоғистон, Бухоро, Жиззах, Навоий, Сирдарё, Сурхондарё ва Тошкент вилоятларида бундай мактаблар умуман йўқ.
Маълумот учун, нодавлат мактабларининг 20 тасида фақат бошланғич таълим берилади. Қолган 23 таси ўрта таълимга мансуб ва улардаги 330 та синфда 6000 нафар бола ўқийди (давлат мактаблари контингентининг 0,12 фоизи).
Изоҳ (0)