Халқаро валюта жамғармасининг Яқин Шарқ ва Марказий Осиё мамлакатлари департаменти директори Жиҳад Азур 14—16 сентябрь кунлари Тошкентда бўлди. Бу ҳақда «Газета.uz» хабар бермоқда.
Расмий идоралар ва бошқа ташкилотлар вакиллари билан учрашувларда иқтисодий вазият ва олиб борилаётган ислоҳотлар, жумладан, алмашув курсларини бирхиллаштириш ва валюта бозорини эркинлаштириш бўйича чоралар муҳокама қилинди.
«Ўзбекистонга иқтисодиётини ислоҳ қилиш жараёнида кўпгина қийинчиликларни босиб ўтишга тўғри келса ҳам, ушбу ислоҳотлар якунда мамлакатни самарали ва равнақ топган иқтисодий тизимга ўтишига имкон беради», — деди Жиҳад Азур ташрифи якунлари бўйича.
У ХВЖ иқтисодиётни ислоҳ қилиш борасида Ўзбекистон билан ҳамкорлик қилишга тайёр эканини тасдиқлади. Минтақавий ҳамкорликни ривожлантириш ва минтақавий савдони кенгайтиришга қаратилган чораларни маъқуллади.
Изоҳ (0)