Қирғизистон ерларининг бир қисми Ўзбекистонга топширилгани борасидаги провокациялар халқаро террорчилик фойдасига ишлайди. Бу ҳақда чегаралар бўйича эксперт, Қирғизистон бош вазирининг собиқ ўринбосари Тоқон Мамитов K-News нашрига маълум қилди.
Маълум бўлишича, WhatsApp мессенжери орқали Алмазбек Атамбаев томонидан Қирғизистон ерлари Ўзбекистонга берилгани ҳақида хабарлар тарқалмоқда. Гўёки бунинг эвазига Ўзбекистон Президенти Шавкат Мирзиёев Қирғизистонда истиқомат қилувчи ўзбекларни Атамбаевга керакли номзодлардан бирига овоз беришга чақиради.
«Фикримча, интернетда ва WhatsApp орқали тарқатилаётган бу хабар ассиметрик характерга эга. Бу ахборотда конкрет фактлар йўқ, фақат сўзлар, тахминлар. Афтидан, бу қирғиз халқига қарши провокация. У Қирғизистондаги вазиятни беқарорлаштиришга қаратилган, навбатдаги этник ихтилофларни олов олдиришга қаратилган», — деди Мамитов.
Унинг сўзларига қараганда, бу ҳозир Қирғизистон ва Ўзбекистон ўртасида ўрнатилаётган муносабатларга путур етказишга уринишдир.
«Бу Қирғизистон хавфсизлигига миллатлараро тотувлик борасида таҳдид солишдир», — хулоса қилди эксперт.
Изоҳ (0)