ЎФФ президенти Умид Аҳмаджонов 40 ёшда. У бунгача қандай соҳаларда фаолият олиб борган?
ЎФФ матбуот хизмати ташкилот президентига айланган Умид Аҳмаджоновнинг таржимаи ҳолини тақдим этди. Унда янги президент карьерасидаги ютуқлар ва ўзгаришлар баён қилинган.
Аҳмаджонов 40 ёшида ЎФФ президенти бўлишга эришди. У 1977 йилнинг 16 май куни Тошкент шаҳрида таваллуд топган. Миллати — ўзбек. Маълумоти — олий. Ўзбекистон давлат жисмоний тарбия институтини имтиёз билан тугатган. Тошкент шаҳар Халқ депутатлари кенгашининг депутати.
У меҳнат фаолиятини 1995 йил «Зенит» фирмасида оддий ишчи сифатида бошлаган. 1995—2001 йиллар давомида «Илму Зиёд» хусусий корхонасида ишчи, кейинроқ 26-сонли қурилиш бошқармасида оператор бўлиб ишлади. Шунингдек, Олимпия АЖда автосаноат бўлими раҳбари сифатида фаолият олиб борди.
Аҳмаджоновнинг спорт соҳасига кириб келишига фаолияти давомидаги ишбилармонлиги ва ташаббускорлиги сабаб бўлди, дейилади таржимаи ҳолда. Ташкилий ишлар, бошқарув соҳасидаги билим ва тажрибалари эвазига у 2002 йил Ўзбекистон ногиронлари спорт федерацияси бош котиби лавозимига тайинланди. 2007 йилга келиб, Ўзбекистон миллий Паралимпия ассоцияцияси Бош котиби ва бир вақтнинг ўзида ташкилот раисининг ўринбосари бўлди.
Қизиқ томони, у 2007 йилда Ўзбекистон дзюдо федерацияси раисига ҳам ўринбосар бўлган. Қўшимчасига, МОҚ вице-президенти лавозимида ҳам самарали фаолият юритган. Яъни, бир йилнинг ўзида 4 та вазифа.
Умид Аҳмаджонов ушбу ташкилотлардаги фаолияти давомида мамлакатда спорт соҳасининг ривожланишига ҳисса қўшди. Мамлакат паралимпиячиларининг жаҳон ареналарида улкан ютуқларни қўлга киритишида катта рол ўйнади. Айнан у ишлаган даврда Ўзбекистон паралимпия делегацияси Рио-де-Жанейро шаҳрида ўтказилган ёзги Паралимпиада ўйинларида тарихий натижа қайд этди. Ўзбекистонлик спортчилар жами 31 та: 6 та олтин, 8 та кумуш ҳамда 17 та бронза медалини қўлга киритиб, ўз тарихидаги энг яхши натижани қайд этди.
Таржимаи ҳоли келтириб ўтилган шахснинг спорт федерациялари ва ассоциацияларидаги кўп йиллик фаолияти, меҳнати ҳукумат ҳамда жамоатчилик эътиборини қозонди. Аҳмаджонов Умид Маҳаматжонович 2017 йилнинг 12 сентябрида Ўзбекистон футбол федерацияси президенти этиб сайланди.
Умид Аҳмаджонов оилали, уч ўғил ва бир қизнинг отаси. Шу вақтгача қилган ишлари учун «Дўстлик» ордени билан тақдирланган.
Таржимаи ҳолда Умид Аҳмаджоновнинг ЎФФ президенти бўлгунига қадар «Пахтакор» клубида аввалига бош директор, кейинроқ президент Бобур Шодиевга вице-президент бўлгани кўрсатилмаган.
Айни вақтда Бобур Шодиев ЎФФ ижроқўмининг аъзоси этиб тайинланган. У «Пахтакор»га қадар Ўзбекистон дзюдо федерациясида вице-президент бўлган. Умид Аҳмаджонов 2007 йил дзюдо федерациясида ишлагани ҳақида юқорида маълумот берилган.
