8 сентябрь куни Тошкентда бўлиб ўтган конференцияда Жиззах вилоятида янги нефтни қайта ишлаш мажмуасини бино этиш лойиҳаси муҳокама қилинди. Бу ҳақда «Дарё»га «Ўзбекнефтгаз» вакиллари маълум қилди.
Тадбир ташкилотчилари «Ўзбекнефтгаз» АЖ бўлди. Конференцияда унинг структур бўлинмалари — «Нефтгазинвест» МЧЖ, «ЎзЛИТИнефтгаз» АЖ, Jizzakh Petroleum МЧЖ ҚК, шунингдек, лойиҳада иштирок этаётган ҳамкор компаниялар — Enter Engineering Pte Ltd, Hyundai Engineering Co Ltd, Amec Foster Wheeler вакиллари иштирок этди.
Конференция чоғида нефтни қайта ишлаш мажмуасиининг имкониятлари ҳамда завод конфигурацияси ҳақида маълумот берилди.
27 апрель куни давлат раҳбари Жиззах вилоятида йилига 5 миллион тонна нефтни қайта ишлаш салоҳиятига эга янги мажмуа қурилишига старт берди.
Жиззах НҚИМ қурилиши мамлакатда бу тармоқнинг ривожланишида муҳим босқич бўлади, деб таъкидланди тадбирда.
Янги мажмуа нефть хомаёшсининг Россия ва Қозоғистон конларидан нефть қувурлари орқали олади.
Йилига 5 миллион тонна нефтни қайта ишлаш йўли билан корхона Euro-5 стандартига мос келувчи 3,7 миллион тонна мотор ёқилғиси, 700 минг тоннадан ортиқ авиацион керосин, шунингдек, суюлтирилган газ, мазут, битум ва бошқа маҳсулотлар ишлаб чиқаради.
Завод қурилиши Jizzakh Petroleum ҚК томонидан бош пудратчи — Enter Engineering Ltd компанияси ҳамда унинг ҳамкорлари томонидан амалга оширилмоқда.
Мажмуани лойиҳалаштиришда етакчи халқаро компания — Amec Foster Wheeler (Буюк Британия) иштирок этмоқда.
Шунингдек, етакчи консултацион компаниялар — Wood MacKenzie (Буюк Британия), Nexant (АҚШ) ва Argus (Буюк Британия) маркетинг тадқиқотлари олиб бормоқда.
Корхона ишга туширилиши билан 2 минг киши иш ўринлари билан таъминланади. Нефть-кимё тармоғидаги ҳар бир иш ўрни ёндош соҳаларда бир неча янги иш ўрни яратади. Лойиҳа реализациясидан сўнг минтақа иқтисодий сегментларида янги истиқболлар пайдо бўлади. Бундан ташқари, НҚИМ электр энергиясининг йирик истеъмолчисига ва юк юборувчига айланади, бу энергетик ва транспорт секторларининг ривожига ҳисса қўшади.
Изоҳ (0)