5 сентябрь куни Ўзбекистон ва Қирғизистон ишбилармон доиралари Бишкекда бизнес-форум ўтказди, деб ёзади UzDaily. Унда Ўзбекистоннинг 20 дан ортиқ ва Қирғизистоннинг 40 дан ортиқ компаниялари қатнашди.
Қирғизистон Савдо-саноат палатаси президенти Марат Шаршекеев савдо-иқтисодий ҳамкорликни янада ривожлантириш учун икки мамлакатда иқтисодий имкониятлар борлигини таъкидлади.
«2017 йилнинг биринчи ярим йиллигида мамлакатлар ўртасидаги товар айланмаси икки марта кўпайди, йил охиригача бу рақам 280 миллион долларга етишини кутмоқдамиз», — деди у.
Ўзбекистон Савдо-саноат палатаси раиси Адҳам Икромов Ўзбекистон бизнеси қирғизистонлик ҳамкасблари билан ҳамкорлик учун очиқ эканлигини айтди.
«Биз кон-руда корхоналари маҳсулотларини импорт қилишга, кондитер маҳсулотлари, озиқ-овқат маҳсулотлари, маиший техника ишлаб чиқариш, автомобиль шиналарини қайта ишлаш бўйича қўшма корхоналар яратишга тайёрмиз. Ўзбекистон Стратегиясида қўйилган вазифалардан бири — Қирғизистон билан йиллик товар айланмасини 500 миллион долларгача кўпайтириш, ва фикримча, бунга бемалол эришиш мумкин», — деди у.
Изоҳ (0)