2 сентябрь куни Россиянинг «НТВ» телеканалида «Ти супер! Танци» телелойиҳасининг давом бошланди. Ўзбекистонлик уч иштирокчи биринчилар қаторида шоуда чиқиш қилди, деб хабар беради «Новости Узбекистана».
Настя, Дурдона ва Моника телелойиҳа саҳнасида ўзбек халқ рақси билан чиқиш қилди. Миллий либосларда ижро этилган рақс ҳакамлар ҳайъати томонидан эътироф этилди. Таъкидланишича, ҳакамлар ушбу рақсга қизиқиш билдириб, ҳатто унинг хатти-ҳаракатларини такрорлашга уринди. Рақс тугагач, қизлар қизғин олқишланди.
Лойиҳа анъанасига мувофиқ, кадр ортидаги овоз иштирокчиларнинг тарихини сўзлаб берди. Маълум бўлишича, Дурдонанинг ота-онаси хасталикдан вафот этган, Мониканинг онасини эса унинг кўз ўнгида ўлдиришган экан. Настянинг онаси эса саккиз йилдан буён ичкиликка муккасидан кетган экан. Шундай ҳаётий қийинчиликларга қарамай, қизлар ўз устида ишлашга куч топа олган экан.
Ҳакамлар ҳайъати Ўзбекистон вакиллари кейинги босқичга ўтишларини бир овоздан ёқлаб чиқди. Уларнинг кейинги чиқишини тахминан бир ойдан сўнг кўриш мумкин бўлади.
Изоҳ (0)