Ўзбекистон адлия вазири буйруғи билан нотариуслар томонидан нотариал ҳаракатлар амалга ошириш тартиби тўғрисидаги йўриқномага ўзгариш ва қўшимчалар киритилди. Бу ҳақда Norma хабар бермоқда.
Мазкур ҳужжатга мувофиқ, пойтахт ва пойтахт вилоятида доимий пропискага эга бўлмаган шахслар Тошкент шаҳри ва Тошкент вилоятида янги барпо этилган кўчмас мулкни қуйидаги шартлар билан сотиб олиши мумкин:
Ўзбекистон фуқаролари, хориж фуқаролари ва бошқа вилоятларда доимий пропискага эга бўлган фуқаролиги йўқ шахслар харид қиладиган кўчмас мулк қиймати энг кам иш ҳақининг 2500 баробаридан кам бўлмаслиги лозим;
Яшаш учун рухсатнома олган чет эл фуқаролари ва фуқаролиги йўқ шахслар сотиб оладиган кўчмас мулк қиймати шартнома тузилган кунга Марказий банк курси бўйича 150 минг доллардан кам бўлмаслиги талаб этилади.
Икки ҳолатда ҳам ўзаро ҳисоб-китоблар Ўзбекистон миллий валютасида банк ҳисоб-рақамлари орқали амалга оширилади. Янги қурилган кўчмас мулк деганда фойдаланишга топширилганига 3 йилдан ошмаган бинолар тушунилади.
Келишувни нотариал тасдиқлаш учун маблағ кўчмас мулк учун ўтказилганини тасдиқловчи ҳужжат ёки уй банк кредити ҳисобидан харид қилинган тақдирда, кредит шартномаси тақдим этилади.
Яшаш учун рухсатнома олган чет эл фуқаролари ва фуқаролиги йўқ шахслар эса Ўзбекистоннинг ваколатли банкларига хорижий валютада камида 150 минг доллар сотилгани ва бундан олинган маблағ сотувчи ҳисоб рақамига ўтказилганини тасдиқловчи ҳужжатлар тақдим этади.
Шунингдек, Ўзбекистон фуқаролари, хориж фуқаролари ва бошқа вилоятларда доимий пропискага эга бўлган фуқаролиги йўқ шахсларга кўчмас мулкни тўловни кечиктирган ҳолда харид қилиш бўйича келишувлар тузишга рухсат берилади. Бу келишувни расмийлаштирган нотариус мазкур кўчмас мулкни бегоналаштиришга тақиқ қўяди ва у шартномада кўзда тутилган маблағ тўлиқ тўлаб берилганидан сўнг бекор қилинади.
Изоҳ (0)