УЕФА Чемпионлар Лигасининг энг яхшилари деб «Реал Мадрид» футболчилари ва Буффонни топди

Кеча — 24 август куни Франциянинг Монако шаҳрида футбол бўйича Европа Чемпионлар Лигасининг гуруҳ босқичига қуръа ташлаш маросими бўлиб ўтди.

Жанлуижи Буффон

Мазкур маросим давомида УЕФА Чемпионлар Лигасининг ўтган мавсумида тўп сурган энг яхши футболчиларни аниқлади. Унга кўра, Туриннинг «Ювентус» клуби посбони Жанлуижи Буффон энг яхши дарвозабон деб топилди.

Буффон ўтган мавсум жамоаси билан олтин дубл қайд этди ва Чемпионлар Лигасининг финалига қадар етиб келди. У мусобақада 12 та учрашув ўтказиб, шуларнинг 9 тасида дарвозасидан тўп олиб чиқмади. «Реал»га қарши финалга қадар Буффон бор-йўғи 3 та гол қўйиб юборганди. Шу тариқа 39 ёшли дарвозабонга тенг келадигани топилмади.

Серхио Рамос

Рамос Чемпионлар Лигасида 100 дан ортиқ ўйин ўтказган 30 нафар футболчидан бири ҳисобланади. У ўтган мавсум «Реал» шарафини мусобақада 11 марта ҳимоя қилди. 1 та гол уриб, 3 та голли узатма берди. Мадридликларнинг Чемпионлар Лигасида кетма-кет икки бор зафар қучган биринчи клуб бўлиб олишида Рамоснинг хизматлари катта.

Лука Модрич

«Реал» ярим ҳимоячиси Лука Модрич ҳам ўз позициясида тенгсиз бўлди. Жамоасининг кубокни олишида хорватиялик футболчи катта меҳнат қилди. У 11 та учрашувда умумий 983 дақиқа ҳаракат қилиб, «Реал» ғалабаларига ўз ҳиссасини қўшди.

Криштиану Роналду

Европанинг ҳимояси энг кучли деб қараладиган уч клуби — «Атлетико», «Ювентус» ва «Бавария» ўтган мавсум Криштиану Роналду томонидан умумий ҳисобда 10 марта ишғол қилинди. Шунинг ўзиёқ португалиялик ҳужумчи энг кучли эканини кўрсатарди.

Роналду нафақат мавсумнинг энг яхши ҳужумчиси бўлди, балки УЕФАнинг ўтган мавсумдаги энг кучли футболчиси деб ҳам топилди.