UzReport телеканали эртага — 25 август куни старт оладиган бокс бўйича Жаҳон чемпионати беллашувларини жонли эфирда намойиш этади. Бу ҳақда телеканал сайти ахборот берди.
Шу йилнинг 25 август куни Германиянинг Гамбург шаҳрида ҳисоб бўйича 19-Жаҳон чемпионати бошланади ва у 2 сентябрга қадар давом этади. Унда 195 мамлакат боксчилари ўзаро куч синашади. Иштирокчилар орасида Куба, Ўзбекистон, Россия, Қозоғистон, Англия, Франция каби етакчи термалар ҳам бор. Ўзбекистон термаси мундиалда барча вазн тоифасида бош соврин учун кураш олиб боради.
Тошкентда ўтган Осиё чемпионатида 9 нафар ўзбекистонлик боксчи олтин медални қўлга киритган бўлса, ўнинчи боксчи плей-оффда муваффақият қозонганди. Бу ҳозирча Осиё чемпионатларида қайд этилган энг яхши натижа бўлиб турибди. Энди ўзбекистонлик боксчилар Жаҳон чемпионатлари тарихидаги энг юқори маррани забт этишга уриниб кўради. Аввалроқ улар Рио—2016 Олимпиадасида муносиб иштирок этиб, умумжамоа ҳисобида 1-ўринни қўлга киритганди.
Шундан келиб чиқиб, UzReport телеканали Гамбургда бўлиб ўтадиган Жаҳон чемпионатини жонли кўрсатишга қарор қилди ва уни эксклюзив трансляция қилиш ҳуқуқини харид қилди.
Жаҳон чемпионатида Рио—2016 ғолиб ва совриндорларидан ташқари, ўз вазн тоифасида Ўзбекистонда энг кучли бўлиб турган қуйидаги боксчилар мамлакат шарафини ҳимоя қилади:
- -49 кг: Ҳасанбой Дўсматов
- -52 кг: Жасур Латипов
- -56 кг: Мурод Аҳмадалиев
- -60 кг: Элнур Абдураимов
- -64 кг: Иқбол Холдоров
- -69 кг: Шаҳрам Ғиёсов
- -75 кг: Исроил Мадримов
- -81 кг: Бектемир Мелиқўзиев
- -91 кг: Санжар Турсунов
- +91 кг: Баҳодир Жалолов
Изоҳ (0)