Томи ва олд ойнаси йўқ Lamborghini учун 1,3 млн доллар тўланди

RM Sotheby’s аукцион уйининг сотувларида томи ва олд ойнаси йўқ ноёб Lamborghini сотилди. Бу Concept S спидстери Gallardo модели базасида қурилган, деб хабар беради Motor нашри.

200 километрдан камроқ масофа босган автомобиль учун 1,32 миллион доллар тўланди.

Даставвал концепт шоу-кар сифатида ўйланган бўлиб, ҳатто унга двигатель ўрнатилиши режалаштирилмаган эди. Бундай автомобиль 2005 йили кўрсатилган эди. Аммо кейинроқ Италия маркаси бундай машиналарни чекланган ададда чиқаришга қарор қилди ва V10 моторли прототип яратди.

Натижада Lamborghini барибир спидстерни серияли чиқаришдан воз кечди. Ушбу машина дунёдаги биринчи ва охирги намуна бўлди.