Наманган вилояти ҳокими ўқитувчи ва шифокорларни ободонлаштириш ишларига жалб этишни тақиқлади

Наманган вилояти ҳокими Хайрулло Бозоров Халқаро пресс-клубда ўқитувчи ва шифокорларни ободонлаштириш ишларига ҳалигача жалб этиб келинаётгани тўғрисидаги саволга жавоб берди, деб хабар қилди UZ24.

Бу бор ҳақиқат, буни яшириб бўлмайди. Уларни нафақат ободонлаштириш ишларида, ҳатто қишлоқ хўжалиги ишларида ҳам ишлатиб келдик. Ўқитувчининг ўзини ишини қилдирмадик, фермерга боғладик. Врачларимизга ўз ишини қилдирмадик, ҚВПда ўз ишлари қолиб, қишлоқ хўжалиги ишлари билан банд бўлишди. Натижада нима бўлди, натижада бугун оналар ўлими ошди, гўдаклар ўлими ошди, лекин ҳеч ким ҚВПга ёрдам бергани йўқ.

Қачонки энди биз кўзимизни очиб кўрсакки, қанақадир оғир аҳволда. Шунинг учун ҳозир ўқитувчиларимизни, умуман бюджет ходимларини жалб қилиш қатъий чекланган. Қайсидир шанбалик, қайсидир тадбир бўлсаки майли, шунда умумий тартибда чақириладиган бўлса. Бизнинг энг забардаст соҳаларимизнинг иккиси ҳам, энг ишонган соҳаларимиздир. Буларни унақанги ишларга, мана ҳокимлар ҳам турибди, уларни бу ишларга жалб этиш тақиқланади, чиқармаймиз уларни бундай ишларга.

Хайрулло Бозоров, Наманган вилояти ҳокими