Наманган вилояти ҳокими Хайрулло Бозоров Халқаро пресс-клубнинг янги — «Тет-а-тет» лойиҳасида қатнашиб, интернетдан қандай фойдаланиши ҳақида сўзлаб берди. Лойиҳа «Ўзбекистон 24» телеканали орқали жонли эфирда намойиш этилди.
Халқаро пресс-клуб раиси Шерзодхон Қудратхўжаев Наманган вилояти ҳокиминниг планшетига эътибор қаратиб, унинг қанчалик интернетдан фойдаланишига қизиқди. «Чунки сиз бугун айтаётган кўп гапларни биз интернетда кўрмаймиз, ваҳоланки, уларни интернетда ёритиб бориш мақсадга мувофиқ бўларди», — деди Қудратхўжаев.
Хайрулло Бозоров ҳокимлик фаолияти интернетда ёритиб борилаётгани, ижтимоий тармоқларда расмий саҳифалар очилганини маълум қилди. «Нафақат вилоят ҳокимлиги, барча туман ҳокимликлари кузатув камералари билан таъминланган, уларни планшетда онлайн равишда кузатиб туриш мумкин», — деди Наманган вилояти ҳокими.
Унинг қайд этишича, вилоят дастурчилари ижро назоратини таъминлашга хизмат қиладиган, қарорлар, буйруқлар, баённомаларда берилган кўрсатмаларнинг бажарилишини онлайн тартибда кузатиб бориш имконини берадиган дастурий таъминот ишлаб чиққан бўлиб, у ҳам планшетга ўрнатилган.
Шерзодхон Қудратхўжаев ҳокимга: «Ижтимоий тармоқлардан фойдаланасизми?», — деб тўғридан-тўғри савол берди. Ҳоким: «Йўқ, ижтимоий тармоқлардан фойдаланмайман», — деб тўғридан-тўғри жавоб қайтарди.
Халқаро пресс-клуб раҳбари эса ижтимоий тармоқда саҳифа очиш давр талаби экани, Ўзбекистон Президентининг депутатлар ва сенаторлар билан учрашувдаги ижтимоий тармоқларда саҳифалар очиш ҳақидаги тавсияси ҳокимлар учун фойдали эканини таъкидлади.
Қайд этиш жоиз, бир муддат аввал Сурхондарё вилояти ҳокими Эркинжон Турдимов Facebook’да ўз расмий саҳифасини очган эди.
Изоҳ (0)