11 август, жума куни Ўзбекистон Республикаси Ташқи ишлар вазирлиги Халқаро муносабатлар ахборот-таҳлилий маркази, БМТ Ривожланиш дастури ваколатхонаси ва Европа хавфсизлик ва ҳамкорлик ташкилоти (ЕХҲТ) лойиҳалари координаторининг офиси иштирокида Тошкент шаҳридаги International Hotel Tashkent меҳмонхонасида «Марказий Осиё — Ўзбекистон ташқи сиёсатининг асосий устувор йўналиши» мавзусида халқаро конференция ўтказилмоқда. Бу ҳақда конференция жойидан «Дарё» мухбири хабар қилди.
Учрашувда Ўзбекистон Ташқи ишлар вазири Абдулазиз Комилов, Сенатнинг халқаро муносабатлар, ташқи иқтисодий алоқалар, хорижий инвестиция ва туризм Қўмитаси раиси Алишер Қурманов, БМТнинг Марказий Осиё учун прeventив дипломатия бўйича Минтақавий маркази раҳбари ва БМТ бош котибининг махсус вакили Петко Драганов, БМТ резудент-координатори Ҳелен Фрейзер, Европа хавфсизлик ва ҳамкорлик ташкилоти координатори вазифасини бажарувчи Ханс-Улрих Им, шунингдек, Олий Мажлис депутатлари, Марказий Осиё давлатларидан экспертлар ва таҳлилчилар, Тошкент шаҳридаги дипломатик корпус вакиллари, Ўзбекистоннинг қўшни давлатлардаги элчилари, республика вазирлик ва идоралари, илмий-таҳлилий марказлари вакиллари ҳамда журналистлар иштирок этмоқда.
Форумда кенг жамоатчиликка Ўзбекистон Республикасининг чегарадош давлатлар билан дўстлик ва яхши қўшничилик муносабатларини мустаҳкамлашга йўналтирилган замонавий, минтақавий сиёсати моҳияти ва мазмуни, шунингдек, Марказий Осиё минтақасида хавфсизлик ва барқарор ривожланишни таъминлашнинг муҳим масалалари бўйича мамлакат позиция ва ёндашувлари ҳақида маълумотлар берилмоқда.
Изоҳ (0)