Ўзбекистондаги 15 та олий таълим муассасасида педагогика йўналишида сиртқи бўлимлар очилади

Ўзбекистон Республикаси Президенти Шавкат Мирзиёев 2017 йил 9 августда «Олий таълим муассасаларида педагогика йўналишида махсус сиртқи бўлимларни ташкил этиш тўғрисида»ги қарорни имзолади, дея маълум қилди Президентнинг расмий веб-сайти.

Педагогика йўналишлари бўйича махсус сиртқи бўлимлар ташкил этиладиган олий таълим муассасалари рўйхати иловага мувофиқ тасдиқланди. Ўзбекистон Республикаси таълим муассасаларига ўқишга қабул қилиш бўйича давлат комиссиясига ушбу рўйхатга ўзгартириш ва қўшимчалар киритиш ҳуқуқи берилди.

Педагогика йўналишлари бўйича махсус сиртқи бўлимлар ташкил этиладиган олий таълим муассасаларида иккинчи ва ундан кейинги олий маълумот бериш сиртқи таълим шаклида ташкил этилади, бунда иккинчи ва ундан кейинги олий маълумот олиш бакалавриат таълим йўналишининг2-курсидан (ўқув режалардаги фанлар фарқидан қатъи назар) камида 3 йил муддат этиб белгиланади.

2017/2018-ўқув йили учун махсус сиртқи ва сиртқи таълимларда ўқув жараёни истисно тариқасида жорий йилнинг 1 октябридан бошланиши белгилаб қўйилди.

Педагогика йўналишлари бўйича махсус сиртқи бўлимлар ташкил этиладиган олий таълим муассасалари рўйхати:

1. Низомий номидаги Тошкент давлат педагогика университети;
2. Андижон давлат университети;
3. Бухоро давлат университети;
4. Гулистон давлат университети;
5. Қарши давлат университети;
6. Наманган давлат университети;
7. Самарқанд давлат университети;
8. Термиз давлат университети;
9. Урганч давлат университети;
10. Фарғона давлат университети;
11. Жиззах давлат педагогика институти;
12. Навоий давлат педагогика институти;
13. Нукус давлат педагогика институти;
14. Қўқон давлат педагогика институти;
15. Тошкент вилояти Чирчиқ давлат педагогика институти.