Тошкентнинг «Пахтакор» футбол клуби 10 август куни австралиялик ярим ҳимоячи Ростин Гриффиц билан шартнома имзолайди. Бу ҳақда клуб матбуот хизмати хабар берди.
Шу куни клуб раҳбарияти ва янги футболчи иштирокида матбуот анжумани ҳам ўтказилади. Қайд этиш жоиз, асли Англияда туғилганига қарамай, Австралия фуқароси ҳисобланган Гриффиц «Пахтакор»да осиёлик легионер лимитини тўлдиради.
Футболчи аллақачон Тошкентга етиб келган. «Championat.asia» сайтида футболчи «Локомотив» — «Машъал» (1:1) учрашувини бевосита стадиондан кузатаётгани акс этган фотосуратни эълон қилган.
Ростин Гриффиц фаолиятини Ўзбекистон Олий Лигасида давом эттириши мумкинлиги ҳақидаги хабарлар аввалроқ Австралия нашрлари томонидан тарқатилган, бироқ унда асли англиялик футболчи қайси клубга кўчиб ўтаётганига аниқлик киритилмаган эди.
29 ёшли футболчи «Пахтакор»га ўтгунига қадар Австралиянинг «Перт Глори» жамоаси шарафини ҳимоя қилиб келаётган эди. Ўзбекистон клубига ўтиш мақсадида Гриффиц «Глори» билан амалдаги шартномасини бекор қилган.
Мавзуга доир: Ўзбекистон клубларидан бири «Блекберн» тарбияланувчиси билан шартнома тузиш арафасида турибди
У 3 йил давомида шу клуб сафида ўйнаган, бироқ Премьер-Лигада тўп суриш насиб қилмаган. Кейинроқ «Гретна» (Шотландия), «Аккрингтон Стенли» (Англия), «Аделаида Юнайтед», «Норт Куинсланд Фьюри», «Сентрал Кост Маринерс» (барчаси — Австралия), «Гуанчжоу РФ» (Хитой), «Рода» (Голландия) каби клублар шарафини ҳимоя қилган.