Россиянинг Новосибирск шаҳрида ўтаётган АрМИ-2017 халқаро армия ўйинларининг энг мураккаб босқичида россиялик разведкачилар жамоаси биринчиликни қўлга киритди. Бу ҳақда, мамлакат мудофаа вазирлигига асосланиб, «РИА Новости» хабар бермоқда.
Босқич «Разведкачи сўқмоғи» деб аталади. Ушбу сўқмоқдан россиялик ҳарбийлар 38 дақиқа 47 секундда ўтди. Хитой жамоаси 39 дақиқа 32 секунд натижа билан иккинчи бўлди. Ўзбекистонлик разведкачилар хитойлик ҳамкасбларидан бир неча секундгина ортда қолиб, 39 дақиқа 44 секунд натижасини кўрсатди.
Уч босқич якунларига кўра ҳам тилга олинган уч жамоа шу тартибда кучли учликни эгаллаб турибди.
«Разведкачи сўқмоғи» ўз ичига 22 тўсиқни олади. Улар орасида ёғоч ва тош деворлар, сув тўлдирилган ўралар, НАТО стандарт девори бор. Бу босқич мусобақанинг энг мураккаб қисми ҳисобланади. Агар мусобақа якунларига кўра икки жамоа бир хил балл тўпласа, мана шу босқичда яхшироқ кўрсаткичга эга жамоа ғолиб деб топилади.
Изоҳ (0)