Одил Аҳмедовнинг шов-шувли интервьюсидан кейин Намангандаги тўсиқлар бартараф бўлди

Ўзбекистон миллий терма жамоаси сардори Одил Аҳмедов икки кун аввал интервью бериб, болалар футболи масаласида Наманганда бошлаган иши айрим тўсиқларга дуч келаётганидан куюниб гапирганди. «Championat.asia» нашри ўша фикрларга Наманганда қандай реакция бўлганини билишга қизиқди.

«Ҳозирча ҳаммаси изига тушди. Бир томондан гапириб олганим яхши бўлди. Йўқса, шаҳар ҳудди бедарвозадек бўлиб қолганди. Мен гапирмасам, у гапирмаса, шундай давом этаверармиди», — деб сўз бошлаган Одил Аҳмедов.

Кейинроқ Одил Аҳмедов баъзи масалаларга ҳалал бераётган киши билан туғишган акаси унинг номидан учрашиб олгани ҳақида айтди. Бироқ ўша кишининг айнан кимлигини ёпиқ қолдиришга қарор қилди.

Ўша гапимдан кейин мухлислар кўп мурожаат қилди. Якунда акам ўша киши билан менинг номимдан мухлислар олдида кўришиб олди. Барча қилаётган ишлари айтилди. Бунгача айрим мухлислар ҳам бизни нотўғри тушунаётганди. Кеча барчасига барҳам берилди.

Шахсан Хайрулла Хайитбойивичнинг ўзи бизни чалғитувчи тўсиқларни бартараф этиб беришга ваъда берди. Менимча, энди биров ҳалал қилмайди, шунга умид қиламиз. Шу ўринда Намангандаги академияни сақлаб қолишга ҳаракат қилган вилоят футбол федерацияси вице-президенти Баҳром Холмирзаевга ҳам миннатдорчилик билдираман.

Одил Аҳмедов, «Шанхай СИПГ» аъзоси

Аввалги интервьюсида Одил Аҳмедов «Навбаҳор» бош мураббийи Илҳом Мўминжонов ҳақида ҳам кескин фикрлар билдирганди. Хитойда тўп сураётган футболчи бу сафар масалага тўлиқроқ тўхталиб ўтди.

Илҳом акага эътироз ёшлар жамоасига эътибор қаратилмаётгани борасида бўлди. Кўпчилик бизга ҳалал берган одам Мўминжонов деб ўйлади. Аслида ундай эмас. Агар у Намангандаги ёшларни асосий таркибга жалб қилса, ҳаммамизга яхши бўлади. Ўринбосарлар таркибини жиддий ўргансин, селексияда қатнашсин, ўйинларни жонли кўрсин, тайёрлов гуруҳи ўйинларига ташриф буюрсин ва ўринбосарлар сафига керакли ўйинчиларни тўлдиришга ёрдам берсин. Мўминжоновнинг вазифаси шундан иборат. Мен болалар футболи билан шуғулланишни бошлар эканман, биздан чиқадиган футболчилар кейинчалик ўринбосарлар сафига бориб қўшилмаса, қилган меҳнатимиз самарали бўлмайди.

Одил Аҳмедов, «Шанхай СИПГ» аъзоси

Ярим ҳимоячи Водий Чемпионлар лигаси ҳар қандай вазиятда ҳам ўтишига ваъда берди. Унинг мақсади фақатгина Наманган эмас, балки Фарғона ва Андижонда ҳам болалар футболини жонлантириш, шу йўл билан Япония, Жанубий Корея футболидан андоза олишга ҳаракат қилишдан иборат.