Сурхондарёда 2017 йил давомида 30 дан ортиқ тадбиркорлик субъекти томонидан қарийб 37 минг тонна қишлоқ хўжалиги маҳсулотлари Россия, Беларусь, Украина, БАА, Ҳиндистон, Эрон, Покистон ва бошқа давлатларга экспорт қилинди. Бу ҳақда вилоят божхона бошқармаси ахборот хизмати маълум қилди.
Афғонистон Ўзбекистоннинг дуккакли маҳсулотларига асосий харидорлардан бири ҳисобланади. Йил давомида воҳадан хорижга экспорт қилинган 14,3 тоннадан ортиқ бу турдаги маҳсулотларнинг 12 минг тоннадан ортиғи, яъни салкам 84 фоизи айнан Афғонистонга етказиб берилди.
—Жорий йилда дуккакли маҳсулотларни нафақат Афғонистон, балки Ҳиндистон, Покистон, Эрон каби давлатларга ҳам етказиб бердик, – дейди «Жарқўрғон-мева-сабзавот» МЧЖ вакили А.Раҳмонов. — Ушбу маҳсулотларнинг экспортига оид божхона расмийлаштирувини аввалгидан фарқли равишда ўз иш жойимиздан, масофадан туриб электрон тарзда амалга оширяпмиз. Бу эса вақт ва сарф-ҳаражатларни тежаб, божхона органларига бормасдан маҳсулотларимизни экспорт қилишда жуда қўл келмоқда. 1 июлдан бошлаб мева-сабзавотларнинг ҳақини олдиндан 100 фоиз тўлаш шарти билан тўғридан тўғри шартномалар асосида экспорт қилиш ваколати доирасида хорижий ҳамкорларимиз билан бир нечта шартнома тузиш арафасидамиз.
Агрофирма вакилининг таъкидлашича, ушбу экспортёр ташкилот орқали 2017 йилнинг 6 ойи давомида салкам 13,5 минг тонна турли хил мева-сабзавот маҳсулотлари хорижга экспорт қилинган бўлиб, уларнинг 8,6 минг тоннасини дуккакли маҳсулотлар ташкил қилади.
Изоҳ (0)