2018 йил 1 январидан йўл ҳаракати хавфсизлиги хизмати бўлинмаларининг жисмоний шахсларга тегишли енгил автотранспорт воситаларини техник кўрикдан ўтказиш функцияси босқичма-босқич тадбиркорлик субъектлари — юридик шахсларга ўтказилади. Бу ҳақда Президентнинг 11 июлдаги йўл ҳаракати хавфсизлигини таъминлаш тизимини такомиллаштириш ҳақидаги қарорида айтилди, деб хабар беради «Газета.uz».
Ҳужжатда фақат енгил машиналар назарда тутилган. Юк, йўловчи машиналари ҳамда махсус транспорт воситаларини техник кўрикдан ўтказиш тартиби ўзгаришсиз қолади.
Кўрсатиладиган хизматлар учун аниқ нархлар белгиланади. Шунингдек, бундай хизмат кўрсатувчи юридик шахсларнинг ички ишлар органлари билан ўзаро ҳамкорлиги талаблари ишлаб чиқилади.
Кейинги йил бошидан техник кўрикдан ўтишни назорат қилишнинг электрон тизимини жорий қилиш режалаштирилмоқда.
Илгарироқ автомобиллар учун ишончномаларни йўл ҳаракати хавфсизлиги давлат хизмати бўлинмаларида рўйхатдан ўтказиш талаби бекор қилиниши маълум бўлган эди.
Изоҳ (0)