Туркия президенти Ражаб Тоййиб Эрдўғон мамлакатда айни вақтда 150 нафар журналист ҳибсда эканлиги ҳақидаги хабарни рад этди. Бу ҳақда BBC’га таяниб, «Интерфакс» хабар берди.
«Ҳибсда сақланаётган шахслар журналист дейилмайди. Уларнинг баъзилари террорчилик ташкилотлари билан ҳамкорлик қилган, айримлари эса қурол сақлагани учун ҳибсга олинган. Яна бир қисми эса шафқатсизлиги ва банкоматларни ўмаргани учун қамоқда сақланмоқда», — деди Эрдўғон.
Эрдўғон ҳибсга олинганларнинг баъзиларида уларнинг журналист эканлигини тасдиқловчи бейжиклар бўлганини, бироқ расмий пресс-карталари йўқ эканлиги ҳақидаги маълумотни тасдиқлади.
«Уларда журналистларнинг бейжиги бор эди, бироқ расмий пресс-картаси бўлмаган, улар шу бейжиклар орқали ўзларини журналист дея эълон қилган. Гап сиз айтганингиздек 170 киши (журналист) ҳақида кетмаяпти, бу ёлғон. Ҳозирда фақатгина икки нафар журналист ҳибсда», — деди Туркия президенти.
Шу билан бирга президент мухолиф журналистлар ҳамон унинг номига кўплаб ҳақоратли мақолалар ёзаётганини қўшимча қилди.
Ўтган йили мамлакатда муваффақиятсиз якунланган давлат тўнтарилиши ҳаракатидан сўнг Туркияда 160 та ОАВ ёпилган, шунингдек, 2,5 мингдан ортиқ медиа ходимлари ва журналистлар ишдан бўшатилган, тахминан, 150 нафар журналист қамоқ жазосини ўтамоқда.
Изоҳ (0)