Нукусда Олий суд раисининг сайёр қабулида Халқ қабулхонасига мурожаат қилган фуқаро суд залида қамоқдан озод этилди

Яқинда Ўзбекистон Республикаси Президентининг Қорақалпоғистон Республикасидаги Халқ қабулхонасида Ўзбекистон Республикаси Олий судининг раиси Козимжон Комиловнинг иштирокида сайёр қабул ташкиллаштирилди. Бу ҳақда Қорақалпоғистон хабар агентлигига таяниб, «KRuz.uz» хабар берди.

Қабулда фуқаро Рустам Қаллибековнинг суд ҳукмидан норози бўлиб ёзган мурожаати апелляция тартибида кўриб чиқилди. Ўтказилган очиқ суд мажлисида фуқаро Р.Қаллибековнинг оилавий аҳволи, олдин судланмаганлиги ва қонун олдида пушаймон бўлиб ҳаммадан кечирим сўрагани сабабли унга эркидан айириш билан боғлиқ бўлмаган жазо тайинланиб, шу вақтнинг ўзида суд залида қамоқдан озод этилди.

Ўғлимни билиб-билмай қилган жинояти бўйича тайинланган жазога норози бўлиб, Президентимизнинг халқ қабулхонасига мурожаат этган эдим. Мана бугун аризамизни сайёр қабулда кўриб чиқиб, ўғлим суд залидан эркинликка чиқарилди. Бунинг учун Президентимизга ўзимнинг чексиз оналик миннатдорчилигимни билдираман. Бундан буён ўғлим қилган хатоларини такрорламайди ва юртимизнинг лойиқ ўғлони бўлишига кафолат бераман.

Рустам Қаллибековнинг онаси Зийнатхан Алланиязова

Шу куни турли мазмундаги мурожаатларнинг қонуний ва одил ечим топишини таъминлаш йўналишида тегишли судларнинг раҳбарларига ва судьяларга аниқ вазифалар белгилаб берилди.