Тошкентда 2 тоннадан ортиқ наркотик воситалари йўқ қилинди
Халқаро мажбуриятларни бажариш мақсадида 26 июнь «Халқаро гиёҳвандликка ва гиёҳвандлик воситаларининг ноқонуний айланишига қарши кураш» куни муносабати билан ҳамда наркотик моддаларни назорат қилиш бўйича Ўзбекистон Республикаси Давлат комиссияси раиси томонидан тасдиқланган жорий гиёҳвандликка қарши кураш ойлиги доирасида Миллий хавфсизлик хизмати мамлакат ҳуқуқни муҳофаза қилиш идоралари томонидан наркобизнесга қарши кураш давомида мусодара қилинган гиёҳвандлик воситаларининг навбатдаги тўпламини йўқ қилиш тадбирини ўтказмоқда.
23 июнь, жума куни идоралараро комиссия томонидан Тошкент шаҳридаги заводлардан биридаги печда 2 тонна 4,5 килограмм гиёҳвандлик воситалари, жумладан, 22 килограмм героин, 1 тонна 154 килограмм опий, 101 килограмм гашиш, 384 килограм марихуана, 337 килограм кўкнор, 170 граммдан ортиқ янги турдаги психофаол воситалар («Спайс» ва бошқалар) ҳамда катта миқдордаги кўкнори хашаги, наша ва психотроп моддаларни ёқиб юбориш тадбири бўлиб ўтди.
Тадбирда БМТнинг Наркотиклар ва жиноятчиликка қарши курашиш бошқармасининг Марказий Осиёдаги минтақавий ваколатхонаси раҳбари Ашита Миттал, Европада хавфсизлик ва ҳамкорлик ташкилотининг Ўзбекистондаги лойиҳалари координатори Жон МакГрегор, Вазирлар Маҳкамаси ҳузуридаги Наркотик моддаларни назорат қилиш миллий ахборот-таҳлил маркази директори Аҳмед Мансуров бу иллатнинг инсоният бошига солаётган мислсиз фожиалари, бугунга кунда халқаро миқёсда ва Ўзбекистонда гиёҳвандликка қарши курашиш борасида олиб борилаётган ишлар хусусида сўз юритдилар.
Бундан ташқари гиёҳвандликка қарши курашишни тарғиб қилувчи энг яхши видеоролик муаллифи ташкилотчилар томонидан тақдирланди.
Маълумот учун, Ўзбекистонда 1994 йилдан буён 57 тонна 443 килограмм наркотик моддалар йўқ қилинган.
